‘Drone Ranger’ deka dikena nyilih ‘Forest Ranger’ Drone moden ti ulih terebai tinggi di langit lalu ngemata tetiap pengawa di tanah, ngumpul data
KUCHING: Kepala Menteri Datuk Patinggi Abang Johari Tun Openg netapka penau ba teknologi drone nyadi bengkah penau ke beguna diatu enggau jemah ila.
Ku iya, ba tetiap pengawa ke dikereja drone deka meri data lalu mutarka pemar ba tetiap pekara.
“Teknologi drone ulih dikena ngaga profail menua enggau nengeri. Kitai nerebaika drone tinggi di langit dikena matau ulah ngereja batang chara belalai.
“Drone mega dikena mansik pengeraja asal ungkup pekara ekonomi kelimpah dikena matau ulah orang berikan ari menua luar ti berikan dalam kandang tasik kitai.
“Tu mih chara baru dikena ngenanka diri lalu kitai nguna teknologi drone ba atur ngintu sereta nempa pekara baru,’ku iya.
Abang Johari mansutka jaku nya rambau bejadi Aum Antarabansa Keterubah Sentang Komputer enggau Guna Drone(ICONDA) 2017 ke diatur di Damai Beach Resort Santubong ditu, kemari.
Ngenang kaul ke sama, iya madah teknologi drone begu- naka arus internet ke deras.
Berindik enggau nya ku iya, Perintah Sarawak keran ngangkatka arus internet ari 50 nyentuk ngagai 100 megabyte persecond.
“Ba Bajet Nengeri 2018 ke dibantaika aku kemari ( ensanus) udah ngulihka pemendar agih belanja RM1 bilion dikena kitai nambah peneras arus internet.
“Aku meri puji ngagai Perintah Besai ketegal ti udah meri setengah bilion ungkup tuju ke sama lalu enggau nya kitai bisi RM1.5 bilion dikena nambah peneras arus internet dalam timpuh dua taun tu,” ku iya.
Sentang ICONDA 2017, Abang Johari meri puji ngagai Universiti Teknologi Mara(UiTM) ketegal udah ngadu aum keterubah ba teknologi nya ditu.
ICONDA 2017 diatur tiga hari berunggu berengkah ari kemari nyentuk 11 November 2017.
Bela datai Sapit Mandal Canselor UiTM(Pansik enggau Industri) Profesor Ir. Dr Abdul Rahman Omar, Reaktor UiTM Sarawak Dato Dr Jamil Hamali enggau orang bukai. SANTUBONG: Teknologi drone deka dikena matau ulah ngereja batang chara belalai di Sarawak, ku Kepala Menteri Datuk Patinggi Abang Johari Tun Openg.
Iya madah drone sebengkah teknologi moden ti ulih nyidi tetiap pengawa sereta ngempuru data, alai Sarawak deka nempa kerejasama enggau Finland ba atur matau ulah ngereja batang chara belalai.
“Baka ke suah dipadah aku sentang ulah ngereja batang chara belalai, kitai ulih nguna ‘Drone Ranger’ nganti ‘Forest Ranger’.
‘ Ketegal drone tu ulih terebai tinggi di langit lalu ngemata tetiap pengawa di tanah. Profail kampung ulih dipeda ari kamera drone ke alai gambar ari kamera nya ulih dipeda besai.
“Maya kitai ngemesaika gambar nya, tetiap pengawa ke digaga ditanah ulih ditemu,’ku iya.
Abang Johari mansutka jaku nya lebuh dikerandau pengudah bejadi Aum Antarabansa Keterubah Sentang Komputer enggau Guna Drone (ICONDA) 2017 ke diatur di Damai Beach Resort Santubong ditu, kemari.
Iya nambah, teknologi drone diatu udah nyadi sebengkah teknologi moden kemaya hari lalu Sarawak enda ulih nyeliah arika ke enda nguna teknologi nya.
Ku iya, drone ulih dikena ngintu pemaik pengeraja asal ke dikembuan Sarawak.
“Kitai Sarawak ngembuan tanah ke besai sereta garis adan menua ke panjai ke alai kitai mega meseti ngintu manah pengeraja asal.
“Pengeraja asal nya meseti diintu lalu dikereja chara profesional ngambika seruran meruan belama,’ku iya nandu.
Ngenang kaul ke sama Abang Johari madah tanah pemesai 2.5 juta hektar ke udah digazet nyadi ‘Heart of Borneo’(HOB) deka diintu nguna teknologi drone.
Ia madah data sentang pengeraja asal dalam HOB sereta pengawa ke nyadi dalam HOB ulih digempuru nguna teknologi drone.
“Enti enda pia, ulah ngereja batang chara belalai deka nyadi lalu tau endar ngeruga rampa menua, ubah gaya hari sereta penusah bukai.
“Nengah data ke digempuru ari teknologi drone,pengawa neritka adat ba kampung ulih ditegapka,” ku iya.
Datuk Patinggi Abang Johari Tun Openg Kepala Menteri Sarawak