Kepala Menteri dipilih nyadi Chairman SMA

KUCHING: Kepala Menteri Datuk Patinggi Abang Johari Tun Openg dipilih nyadi Chairman Sarawak Multimedia Authority ( SMA) laban iya nyadi Ketuai Eksekutif (CE) Nengeri.

Menteri Dagang Entarabansa enggau E- Dagang Dato Sri Wong Soon Koh madah, nyadi CE Menua, Abang Johari nanggung semua pengawa ke digaga perintah nengeri.

“Kepala Menteri siku Ketuai Eksekutif (Sarawak), iya dipilih nengah pengawa bepilih demokrasi lalu iya mangku betanggungpengawa ba pengawa ke dipejalaika perintah nengeri.

“Nyata endar Kaban Kunsil Nengeri Kota Sentosa (Chong Chieng Jen) enda nemu pasal portfolio opis menteri dalam rintai kabinet (nengeri), Kepala Menteri nya nyadi Menteri Ekonomi Digital enggau Telekomunikasyen baka ke bisi di padah kena 22 Mei 2017 tu tadi, reti nya iya bisi portfolio ke berat dipangku iya nya nyadi ketuai ngemata ekonomi digital enggau tel- ekomunikasyen,” ku iya.

Iya madah munyi nya ba aum media ba Aum Kunsil Nengeri (DUN) ditu, kemari.

Wong ti mega Menteri Wang Kedua madahka penuduk nyadi Menteri Dagang Entarabansa enggau E-Dagang semina sebagi ari penuduk dipangku iya empu.

“ADUN Kota Sentosa mega nanya nama kebuah ukai aku nyadi chairman SMA,?

“Penuduk kepala menteri nyengkaum semua, lalu SMA dikenuku dikena ngemansangka ekonomi digital di Sarawak,” ku iya.

Iya nandu baru madahka Kepala Menteri ti mega nyadi chairman SMA tau betanya pekara ke bekaul enggau penyanding penemu tauka konsultan enti iya begunaka penemu tauka pemadah pasal pekara nya.

“Nya kebuah kepala menteri dipeda bisi nemuai ngagai menua tasik ke maju ba ekonomi digital baka Estonia laban menua nya nyadi chunto ke pemadu manah ba pekara tu,” ku iya.