Kunsil Nengeri Sarawak setuju milih Dr Nuing nyadi senator Dewan Negara

KUCHING: Kunsil Nengeri (DUN) Sarawak udah setuju Dr Nuing Jeluing dipilih nyadi senator Dewan Negara pengudah bulih sukung majoriti kaban kunsil nengeri maya baum DUN, kemari.

Iya ti dichalunka Menteri Utiliti Dato Sri Dr Stephen Rundi Utom lalu disukung Menteri Muda Hal Ehwal Korporat, Abdullah Saidol.

Pekara nya dipadahka Speaker Kunsil Nengeri, Datuk Amar Mohd Asfia Awang Nassar.

“Dr Nuing bulih 69 undi lalu Nicholas bulih 10 undi, lalu enggau tu aku ngesahka Dr Nuing nyadi senator,” ku iya.

Sekretari DUN udah nya madahka piak iya bisi nerima rasmi ari Dr. Nuing kena 6 November 2017 tu tadi , ti madahka diri ulih sereta sanggup gawa nyadi senator nyema dipilih.

Kelimpah ari nya Dr Rundi lebuh ti mantaika perambu nyalun Dr Nuing madahka, Dr Nuing kala meri servis dalam opis perintah iya nya ba sepital perintah kenyau ari taun 1996.

Dr Nuing ku iya, ketuai pampang Parti Pesaka Bumiputera Bersatu ( PBB) Kakus kelimpah ari ke mangku pengawa nyadi kaban Majlis Tertinggi parti nya sereta kala nyadi Ketua Pegawai Perubatan Shell Malaysia Berhad.

Maya pengawa bepilih nya kemari, Dr Nuing berebut enggau chalun ti dikenataika penyakal, Nicholas Bawin Anggat, 59, ti dichalunka Baru Bian (PKR-Ba’Kelalan) lalu disukung Chong Chieng Jen (DAP-Kota Sentosa).

Dr Nuing nyadi senator nganti Datuk Lihan Jok.

Lihan berengkah nyadi senator kena Disember 2014 sereta abis timpuh mangku pengawa nya 7 Disember 2017. Berindik ari nya penuduk senator puang kena 8 Dec 2017.