Penembu jematan tu deka nyadi jalai puntang dikena ngelawa sekeda palan besejarah ba kandang mengeri tu
KUCHING: Jematan baru baka urup S diberi nama Darul Hana disadang ulih matak mayuh agi penatai bala temuai ngagai Sarawak.
Kepala Menteri Datuk Patinggi Abang Johari Tun Openg madahka Jematan Darul Hana deka nyadi sebagi ari pelengkap Halaman Heritage Trail, nyendiaka jalai puntang ngagai taba besejarah mengeri tu.
“Tu deka nyadi perengka ke pemadu beguna endar dikena nempa pemujur Halaman Heritage Trail, ngelawa Kuching ari begunan Aum Kunsil Nengeri (DUN) lama, mansa Botanic Gardens enggau Orchid Garden ngagai Fort Margherita ikonik, sereta begunan DUN baru.
“Pejalai terus meraka jematan baru ngagai Tebing Sungai Kuching enggau kandang menua Padungan sereta terus ngelawa Rumah Kort Lama ti tebilang, Pasar Besai enggau kampus Muzium Sarawak ti benung digaga,” ku iya sebedau Tuai Pemegai Menua (TYT) Tun Pehin Sri Abdul Taib Mahmud bejadika jematan baru di Tebing Sungai Kuching, ditu, malam Hari Enam tu tadi.
Abang Johari mega ngarapka kelai menua baru di indu mengeri nya deka nyadi pematak penatai bala temuai nemuai ngagai Sarawak, kelebih agi Kuching.
Ku iya, penatai bala temuai di nengeri tu udah nambah ngagai 16 peratus dalam semilan bulan keterubah taun tu dibanding timpuh ke sama taun nyin tadi.
Iya ngarapka penatai bala temuai di Sarawak deka seruran nambah berindik ari pengawa ngelancharka jematan urup S nya.
“Struktur ikonik pemadu baru mai pengagit ke baru ngagai mengeri Kuching lalu iya nyadi siti pekara ti ngasuh rayat kitai temegah.
“Langkar jematan ti nyelai, dipelaba deka nyadi sekeda ari jematan ti bisi langkar baka nya di Asia Tenggara, nempa iya nyadi ikon dramatik ke baru ungkup Kuching, ti deka mai kededua tebing Sungai Sarawak bela ba nunga begunan DUN, kelebih agi kelai penyerakup peranak Sarawak taja mayuh bagi menua ari sungai,” ku iya.
Ku iya, arkitek jematan baru, ti diperambu Taib, ditempa enggau pemanah gaya, pengelantang enggau penyebela ba runding.
“Komponen individu jematan baka dermaga enggau tali karan semua disambung enggau lanchar lalu tetiap bagi nya enda ulih bediri enti nadai ke bukai.
“Tu ngayanka Sarawak ke alai peranak pupu bansa enggau main asal beserakup di baruh pegai TYT Tun Pehin Sri ke diatu tumbuh dalam komuniti ti bebaik,” ku Abang Johari nambah.
Ku iya, jematan nya, ti digaga di tengah taba pesaka asal mengeri, tuju iya deka nambahka kaul antara mengeri utara enggau selatan, pulaika pemaik ngagai bala temuai enggau peranak Kuching empu.
“Tu pemujur ti disukung sambung tali karan ti nyambung legit dua jematan beperabung, nyengkaum kededua jematan buluh Bidayuh Sarawak enggau lengkuk sungai seraya langkar enggau inovasyen kelai moden dinamis Sarawak.
“Jematan pejalai kaki Curvilinear Steel Cable Stay bisi 335 meter pemesai ti mungkur pemesai Sungai Sarawak enggau 200 meter. Iya digaga di atas tiga set dasar pondasyen, dua simen hidbrid enggau menara besi sereta siti jalai adap ke selatan,” ku iya nambah.
Iya muji Serikat Pemansang Ekonomi Sarawak (SEDC) ti udah nembuka jematan baru meraka Sungai Sarawak.
“SEDC seruran bejalaika pangku pengawa nya nyadi peransang pemansang ekonomi nengeri lalu jematan baru nyadi siti ari projek SEDC ti dipejalai dikena ngemujur perambu perintah ngemansang Sarawak,” ku iya.
Antara bala ke bisi datai bini Taib, Toh Puan Datuk Patinggi Raghad Kurdi Taib, bini Abang Johari Datin Patinggi Dato’ Juma’ani Tuanku Bujang, Sekretari Nengeri Tan Sri Datuk Amar Mohd Morshidi Abdul Ghani, Speaker DUN Datuk Amar Mohd Asfia Awang Nassar, Sapit Kepala Menteri Datuk Amar Awang Tengah Ali Hasan.
Struktur ikonik pemadu baru mai pengagit ke baru ngagai mengeri Kuching lalu iya nyadi siti pekara ti ngasuh rayat kitai temegah. Datuk Patinggi Abang Johari Tun Openg Kepala Menteri Sarawak