Sistem parit enggau entali ai ba tiga genturung pendiau deka dipansik

KUCHING: Pansik silik sentang atur nyendia sistem parit enggau entali ai ke meruan deka diadu ba tiga bengkah genturung pendiau di Kuching, ku Menteri Pengeraja Asal enggau Rampa Menua Dato Sri Wan Junaidi Tuanku Jaafar.

Iya ke mega Kaban Parlimen (MP) Santubong madah ketetiga genturung pendiau ke disebut iya nya di Kpg Tabuan enggau kandang endur ngelingi, Kpg Buntal enggau Kpg Panglima Seman nyentuk ngagai Bintawa.

“Aku minta pansik ke silik diadu kelebih agi ba sentang ungkus projek sebedau Bajet 2018 ungkup opis menteri dikemendar.

“Tu ketegal Ketuai Direktor Opis Parit enggau Entali Ai (DID) deka nyendia perambu chara kitai melanja duit.

“Enti duit dah bisi, iya ( ketuai Direktor) deka berandau enggau aku lalu berundingka chara melanja duit ungkup taun 2018,’ku iya.

Wan Junaidi mansutka jaku nya ba seiti pengerami di SK Tabuan Hilir pengudah ngelawa palan Projek Sistem Entali Ai ungkup kandang ngelingi Kpg Tabuan Melayu enggau Kpg Tabuan Drahman ditu, kemari.

Ngenang sentang projek ke dikemata kemari, Wan Junaidi madah RM2.3 juta udah disedia opis menteri iya ungkup tuju nya.

Belanja RM2.3 juta nya ku iya dikena ngemujur enam bengkah projek ngangkatmanah sistem parit enggau entali ai di Kpg Tabuan Melayu enggau Kpg Tabuan Drahman.

“Ke amat projek tu tanggungpengawa majlis bandaraya. Tang engka sida bisi kurang belanja ketegal kandang endur ke diintu MBKS enggau DBKU chukup besai.

‘ Kitai ( DID) mantu ba sentang pekara tu ke alai aku udah bulih pemendar ari Menteri Besai mantu majlis bandaraya.

“Enti nadai menteri ditu engka projek tu enda nyadi nyata,’ku iya nambah.

Enam projek nya dikearap ulih nyeliah peranak ke diau ngelingi kelebih agi dikededua genturung pendiau arika napi penusah bah ngenyit ke suah nyadi.

Bela datai Ketuai Direktor DID Dato Dr Md Nasir, Pengulu Jas Said enggau orang bukai.