4096 graduet udah nerima degree maya Konvokesyen UNIMAS ke-21
KOTA SAMARAHAN: Nyerumba Konvokesyen Universiti Malaysia Sarawak (UNIMAS) ke-21, beratika urung 3,662 graduet prasiswazah sereta 434 graduet siswazah, alai ari penyampau nya, 68 sida ngambi PhD, enggau 376 pelajar Master mujur nerima degree sida.
Atur pengawa konvokesyen UNIMAS ke-21 ke diatur dalam kandang lima hari bepun ari 6 ngagai 9 November 2017 digaga bepalan ba Dewan DeTAR Putra ditu.
Atur pengawa konvokesyen ke- 21 nya mega dimunka Canselor UNIMAS, Tuan Yang Terutama Yang Di-Pertua Negeri Sarawak, Tun Pehin Sri Abdul Taib Mahmud ba sidang pemungkal.
Ba atur pengawa nya kemari ( Sidang 1) beratika Kepala Menteri Datuk Patinggi (Dr) Abang Johari Tun Openg dituduh mangku pengawa nyadi Pro Canselor UNIMAS.
Taib mega nyuaka ijazah doktor falsafah sereta sarjana ngagai urung 444 graduet sereta graduet ari Fakulti Bahasa enggau Komunikasi UNIMAS dalam program linguistik urung 48 iku gra- duet.
Ba atur pengawa nya mega Taib nyuaka gelar akademik, Gelar Pelajar Di Raja (Midul Jaya Cemerlang), Gelar Canselor enggau Gelar Pro canselor ngagai graduet ke dipilih nengah penyulut sida iya dalam akdemik enggau Ko Kurrikulum dalam kandang bala nembiak tu belajar di universiti nya.
Entara penerima gelar nya, seiku nembiak Iban ari Sibu, Tipah anak Lihong, 22, ke udah nembuka pelajar iya dalam program Sains enggau Pengatur Pemisi Akuatik baruh pegai Fakulti Sains enggau Teknologi Pemisi, Emira Izzati Abdul Aziz, 22, (program Sains enggau Pengatur Pemisi Jelu) ke mujur bulih gelar, Gelar Pelajar Diraja, Tan Yao Xiong, 24, ari Ipoh, Perak, nembiak baruh Fahulti Sains Kognitif enggau Pemansang Mensia, mujur bulih Gelar Pelajar Diraja enggau Amirah Fadullah Suhaimy, 22, ke ngambi ku Pemansanhg (Sumber Manusia) nerima Gelar Pro-Canselor.
Pia mega seiku penyanyi Iban, Diana anak Anthony Belikau, 29 ari Kapit (Nanga Mujong, Paku, Kapit)udah 10 taun lebih diau di Bandaraya Kuching, mujur nembuka pelajar iya lalu bulih Sarjana Pentadbiran Perniagaan Korporat baruh Fakulti Dagang enggau Ekonomi (FEB).
Lebuh ditanya bakani ku iya ulih magi jam iya belajar, gawa sereta nyadi penyani, ku iya, pengawa magi jam nya chukup pedis.
“Tu siti pejalai ke jauh, bisi ka tusah mimit laban aku gawa, belagu (malam) sereta belajar. Ati enda tau enda tegut. Maya belelak sereta tinduk enda tau enda chukup, laban berundingka diri empu nurun gawa pukul 8 pagi, belajar agi, ni ke belagu agi.
“Mula-mula mutus deka nyambung pelajar, ku aku, tu ke pemanah aku, pajakka dulu, tang sepemanjai pejalai nyadi nembiak universiti, kitai enda tau enda ‘enjoy’ pejalai nya,” ku Diana.
Diana ke berengkah belagu dalam taun 2011, tebilang enggau lagu iya, dalam 2012, 2011 Jerungkang Tajam Gerenyam, Sayau ke Nuan, sereta lagu baru diatu, Bujang Rekon, tau nyadi ‘ikon’ artis Dayak ke bepelajar sereta bepengelandik.
Kemari, Diana bela disempulang ulih indai iya, Lindon anak Sain, 69 taun enggau menyadi tuai iya, Christina Anthony Belikau,39.