Ketuai komuniti Dayak meseti beserakup nyukung ubah ba Kanun Tanah Sarawak
MIRI: Bala ketuai raban bansa Dayak dalam kabinet nengeri meseti beserakup nyukung sereta ngundi ubah ba Kanun Tanah Sarawak, kelebih agi bekaul enggau Tanah Adat Bansa Asal (NCR) nyengkaum Pemakai Menua enggau Pulau Galau (PMPG).
Nitih ku aktivis hak bansa asal enggau luyar, Abun Sui, tu awak ti patut ngagai sida ngayanka diri nyukung komuniti Dayak di nengeri tu, ngetanka tanah NCR sida enggau PMPG, nejuka bida politik sida ke tisi.
“Aku dipadahka rambau aum Dewan, Kaban Kunsil Nengeri (ADUN) Ba’ Kelalan mantaika mosyen ti nyengkaum PMPG ke dalam Kanun Tanah Sarawak ngambika bisi kuasa undang-undang ngaku PMPG.
“Kitai andalka bala pemesai Sarawak, kelebih agi pemesai Dayak, ulih nyukung enggau ngundi mosyen tu lebuh dipinta ngundi, ngambika iya dikemendar,” ku iya dalam penerang berita.
“Sekalika kitai deka tauka enggai, kitai meseti nerima isu tanah NCR enggau PMPG ke diatu nyadi pekara dikemerat komuniti Dayak, kelebih agi bansa Iban, lalu sebarang alai dilawa kita, rayat bejakuka pekara tu,” ku iya nambah.
Nitih ku iya, peranak Sarawak kelebih agi bansa Dayak diatu seruran beratika tetiap pejalai DUN lalu pekara balat diperatika sida iya nya isu bekaul enggau NCR enggau PMPG.
Nyerumba aum DUN, gempuru likun ti diatur Serakup Dayak Iban Sarawak (SADIA) Kuching deka digaga di Tebing Sungai Kuching kena 13 November tu, mantaika sukung rayat enggau ngansak pengari rayat ngambika ngundi enggau ngemendarka mosyen ti dibantaika Baru Bian.
Ku Abun, iya endang nyukung gempuru nya sereta deka nyereta, seraya nesau semua pupu bansa, nadai ngira pegai politik sida, datai lalu ngayanka sukung sida ari pengawa ngambi bagi dalam gempuru nya.
“Aku meri tabi selamat ngagai semua pengari rayat maya atur DUN sereta selamat ngundi ngagai semua ADUN ti gawa ngetanka hak rayat enggau sida empu,” ku iya silik.