Penegap runding ti ulih bekerejasama endang jalai mutarka penanggul
SIMUNJAN: Ketuai raban bansa dilalau terus ngenegapka kerejasama rat ba renggat baruh dulu dikena nentuka pemujur Barisan Nasional (BN) ba pengawa bepilih ke datai.
Menteri ba Opis Menteri Besai, Datuk Seri Nancy Shukri madahka penegap runding ti beripai endang jalai dikena mutarka penanggul.
Nitihku iya, nyadi ketuai patut bisi tanggungpengawa sereta bejalaika pengawa mantu raban bansa.
“Kitai begempuru, berandau sereta ngiga jalai mutar ka nya nyema bisi penanggul dalam parti.
“Nama ke pemadu be- guna, penegap runding beripai tauka beserakup enda tau enda bisi, ngena chara nya, kitai ulih mutarka sesebengkah penanggul,” ku iya.
Iya ke mega Kaban Parlimen (MP) Batang Sadong madahka pekara nya lebuh ngulu Majlis Penangguhan Sukaneka Mesra Rakyat di Kampung Semalatong ditu, kemari.
Ngenang silik pekara nya, Nancy minta ketuai parti ba renggat baruh bejalaika tanggungpengawa enggau lurus.
Ngenang pasal program nya, iya madahka sukaneka nya diatur dikena ngempitka kaul entara raban bansa seraya dikena ngelala orang bepenau tauka pengelandik baru ba lumba enggau main.
Kelimpah ari nya iya ngasuh mensia mayuh ngambika ngatur program ngintu pemeresi enggau ngemeranka ulah ti manah awakka ulih nempa raban bansa ti beresi sereta bejaku bisi belebas.
“Nya alai bala ketuai patut meri chunto ti manah sereta bejalaika tanggungpengawa enggau meruan dikena nentuka genturung pendiau seruran beresi sereta bisi kereban dikena,” ku iya.
Dalam kitai bebendar deka ngemanahka perengka guna ke udah bisi, Nancy madahka peminta ngemanahka balai mayuh guna deka diperatika bepelasarka ungkup belanja taun baru.
Kitai begempuru, berandau sereta ngiga jalai mutar ka nya nyema bisi penanggul dalam parti. Datuk Seri Nancy Shukri Menteri ba Opis Menteri Besai