Terabai Menua nyukung penuh gempuru likun ti diatur SADIA
MIRI: Gerempung ukai dikuasa perintah ( NGO) Dayak, Terabai Menua ( TM) mantaika sukung sida ngagai gempuru likun ti diatur Serakup Dayak Iban Sarawak (SADIA) di Tebing Sungai Kuching, kena seharitu.
Dalam penerang berita ditu kilah ensana, TM ngaku gempuru nya mai reti chukup besai ngagai komuniti Dayak ditu dikena ngayanka sida endang serius ngetan sereta negika isu bekaul enggau bansa sida baka hak tanah Adat Bansa Asal (NCR), sereta mega Pemakai Menua enggau Pulau Galau (PMPG).
“Gempuru likun tu endang besai reti ngagai komiti Dayak laban nya ngayanka pengeran semua bansa Dayak di nengeri tu ti bela datai beserakup ngetanka tanah NCR sida.
“Tu tanah sida lalu hak udah diberi ngagai sida ari peturun aki ini sida. Tu mega siti ari pekara ditegika TM ungkup bansa Dayak ditu,” pia ku Penyanding Penemu TM, March Jenggo ngarika serakup nya.
“Sehari tu, bisi lebih ari 400 kes tanah NCR Dayak ba kort, ngaul beribu ruang bilik. Bansa Dayak nyadi kampar di menua diri lebuh lenyau tanah NCR Sida.
“Rayat nadai kala ningkah pengawa perintah ngemansangka tanah NCR tang chara tanah nya dirampas ari pengempu tanah nengah pengawa ngeluarka lisin PL ngagai kompeni ti ngerampas hak tanah ari pengempu iya,” ku Mark.
Ku iya, nyema Perintah Sarawak endang keran deka mantu komuniti Dayak mutarka isu tanah sida, perintah ulih ngubah Kanun Tanah Sarawak enggau ngakun status tanah Pemakai Menua enggau Pulau Galau (PMPG) ngagai komuniti Iban.
“Tentu semua penanggul bekaul enggau PMPG deka teputar” ku iya seraya nambah bala kaban TM mega deka nyereta gempuru likun ti disukung mayuh NGO Dayak.
Ku iya, TM ngansak semua bala kaban di selampur Sarawak ngambi bagi dalam gempuru likun ti minta perintah ngaku tanah NCR enggau PMPG di dalam Kanun Tanah Sarawak pulaika pemaik bansa Dayak di nengeri tu,” ku iya nambah.