Wan Junaidi ngelempaika ngagai ketuai PBB milih iya tauka enda
KUCHING: Kaban Parlimen (MP) Santubong Dato Sri Wan Junaidi Tuanku Jaafar ngelampaika pemutus ba runding ketuai parti Pesaka Bumiputera Bersatu ( PBB) enggau Barisan Nasional ( BN) sekali iya dipilih bediri baru tauka enda.
Iya ke mega Menteri Pengeraja Asal enggau Rampa Menua Malaysia madah deka bebasaka sebarang aja pemutus ari ketuai renggat tinggi.
Wan Junaidi ti udah enam penggal nyadi MP enda irauka berita selebubu diak MP ti udah lebih 20 taun meri servis deka diketu lalu enda ngenanka penuduk ba Pengawa Bepilih Besai Ke14 (GE14).
Pemutus sentang pekara tu dilempaika ngagai Kepala Menteri ke mega Presiden PBB sereta Chairman BN Nengeri.
“Pemutus mega dilempaika ngagai Chairman BN Pusat iya nya Menteri Besai lalu sebarang pemutus deka dipebasa,’ku iya.
Wan Junaidi mansutka jaku nya ba siti pengerami di SK Tabuan Hilir pengudah ngelawa palan Projek Sistem Entali Ai ungkup kandang ngelingi Kpg Tabuan Melayu enggau Kpg Tabuan Drahman ditu, kemari.
Iya nambah, PBB sebengkah parti ti seruran meri basa ngagai raban ketuai lalu nya mih bida PBB enggau parti bukai.
Ku iya, enti pekara nya nyadi ba parti bukai engka tau ngasuh ringat sereta nyadi laya.
“Tu mih kelai pemujur PBB ke alai kenyau 27 taun aku ba politik dalam PBB, parti enda kala alah sigi penuduk baikka nya ba penuduk kunsil nengeri tauka parlimen.
“Sigi ditemu kitai PBB siti parti ke tegap sereta ngembuan semengat ke tinggi lalu PBB dikemegahka aku,’ku iya.
Wan Junaidi ,71, udah nyadi MP ungkup parli- men Batang Lupar ari taun 1990 nyentuk ngagai 2004 sebedau iya ngalih ngagai Santubong nyentukka diatu.
Maya ba Batang Lupar, iya mujur nukar konstitusyen nya ari ‘grey’ ngagai ‘white’ ba sentang sukung rayat ngagai BN.
Nitihka “BN WhatsAp Group”, kelimpah Wan Junaidi, sekeda menteri bukai pan bisi disebut enda ngenanka penuduk.
Nitihka berita selebubu nya BN Sarawak deka nyabung 14 iku chalun baru ba GE14 iya nya enam ari SUPP, dua ari PDP enggau PRS sereta 4 ari PBB.
Tiga MP ari PBB udah madah deka nyurutka diri iya nya Sapit Kepala Menteri Datuk Amar Douglas Uggah (Betong) Sapit Menteri Kuasa, Teknologi Gadung enggau Ai Dato Sri James Dawos Mamit ( Puncak Borneo) enggau Tan Sri Dr Muhammad Leo Micheal Toyad (Mukah).