Sarawak ngembuan tanah ke besai, tang agi kurang diuan mensia
KUCHING: Pelilih Menua Serian, sitak Bukit Sadok ( di Betong) enggau Hab Halal (di Tanjung Manis) entara sitak ke deka dikemansangka alai bekebun buah rian ke bekualiti.
Kepala Menteri Datuk Patinggi Abang Johari Tun Openg madah Sarawak ngembuan tanah sereta sitak ke besai, tang enda mayuh mensia ke nguan menua tu.
“Tanah kitai besai, pemayuh mensia ke diau ditu enda mayuh, lalu pemesai sereta pemayuh tanah nya ulih alai kitai merambu nyadi sitak ke ngeluarka pemakai.
“Entara sitak ke ulih alai bekebun buah iya nya baka Bukit Sadok (di Betong) enggau Hab Halal di Tanjung Manis,” ku iya.
Iya madah munyi nya lebuh bejaku ba aum media pengudah mungkal MoU entara MOA enggau Top Fruits Sdn Bhd (Sarawak) di Palan Konvensyen Penview ditu,kemari.
Ungkup kebun buah rian ku iya, Sapit Kepala Menteri ti mega nyadi Menteri Betanam Betupi Moden, Tanah Adat enggau Pemansang Menua Pesisir, Datuk Amar Douglas Uggah anak Embas ku iya, udah bisi datai tanah di Serian enggau sitak (sub-urban) tang bedau diputuska agi pemesai tanah nya.
“Semina ke dipadah, pemayuh pun rian kediatu di Serian manggai urung 18,000 pun tang bemusin. Tang enti kebun buah rian tu digaga chara sistematik, nyangka iya deka nyadi
Tanah kitai besai, pemayuh mensia ke diau ditu enda mayuh, lalu pemesai sereta pemayuh tanah nya ulih alai kitai merambu nyadi sitak ke ngeluarka pemakai. Datuk Patinggi Abang Johari Tun Openg Kepala Menteri Sarawak
baka kebun sawit,” ku iya.
Abang Johari ti mega nyadi Menteri Wang enggau Perambu Ekonomi nandu baru madahka di Sarawak, menua tu ulih ngungkupka urung 177,000 hektar alai bekebun buah lalu entara komoditi buah ke tau ditanam iya nya baka buah rian.
“Tang utai tanam bukai buah nenas pan tau, buah nyiur pan tau. Baka buah nyiur, makit dunya diatu kurang endar buah nyiur, nya alai, baka pelilih menua Sebuyau, Simunjan, sigi diperansang alai bekebun nyiur.
“Lalu baka nya mega enggau buar rambutan, dabai enggau terong Dayak,” ku iya.
Sama bisi enggau ngulu atur pengawa tu kemari, bini Kepala Menteri,Datin Patinggi Dato Juma’ani Tuanku Bujang, Sekretari Perintah Menua, Tan Sri Datuk Amar Morshidi Abdul Ghani, Sapit Menteri Pengawa Betanam Betup, Dato Anthony Nogeh, Menteri Muda Pengawa Betanam Betupi, Dr. Abdul Rahman Ismail, Direktor Opis Betanam Betupi, Datu Lai Kui Fong enggau Direktor Top Fruits (Sarawak) Sdn Bhd, Dr Tan Sue Yee sereta sekeda pemesai bukai.