Riot nerima sukung penuh ari kaban SUPP ngenanka penuduk Serian
SERIAN: Menteri Penguasa Pemayuh Pengereja Pengawa Datuk Seri Dr Richard Riot bulih sukung penuh ari semua lapan pating parti SUPP ti dekaka iya sekali agi nyadi chalun ngenanka penuduk Serian.
MP Serian enam penggal nya udah nyadi ketuai SUPP pampang Serian dalam timpuh 26 taun ke alai iya mega nerima sukung penuh ari bagi Orang Indu sereta Nembiak parti ngambika bediri di Serian ungkup ketujuh kali.
Nengah sukung ke enda bebagi nya nya, Penyanding Penemu SUPP ranting Serian Chai Kim Sin madah Riot chalun ke pemadu ulih menang lalu nadai orang nganti naka ke diatu.
“Ukai pemutus ke ngena enti kitai berunding deka nganti seiku orang ti udah bejalaika pengawa enggau manah kelimpah ti dikerindu semua.
“Ya, sigi bisi sekeda orang madah Riot udah enam peng- gal ba penuduk nya lalu patut meri jalai ngagai orang bukai ke biak.
“Aku chukup ngelala MP, iya bisi pengering lalu ba umur 64, iya 25 taun biak ari Menteri Besai ke dulu Tun Dr Mahathir Mohamad.
“Enti Tun ngasai iya agi ulih mangku pengawa nyadi Menteri Besai, aku ngasai nadai kebuah MP kami kelalu tuai bediri ngenanka Serian ba GE14,”ku Chai.
Ngenang kaul ke sama, Ketuai Pemadah SUPP Serian, Lawa Gunyau enggau nyemetak madah nyukung Riot nyadi chalun ba GE14.
Ku Lawa ke mega Sekretari pating SUPP Balai Ringin ti udah suah bejalai ba genturung pendiau majoriti Iban, pengundi Iban semina bisi seiku chalun lalu nadai orang bukai kelimpah ari Datuk Seri Dr Richard Riot Jaem.
Lawa nambah Riot mega nerima sukung penuh ari kaban dalam Gerempung Veteran Angkatan Tentera Malaysia (PVATM).
Siku kaban parti, Akim Amit ti ngarika komuniti melayu ari Kpg Tebekang Melayu madah Riot ukai semina deka menang ba Serian tang tau bulih majoriti undi ngelui ari 13,000 undi.
“Aku beratika pekara tu deka nyadi ketegal pemanah ba SUPP. Tajapan parti bisi 3,000 iku kaban berejista sukung ngagai Riot tetap chukup manah.
“Diatu SUPP bisi 4,451 kaban parti, iya nya nambah 900 kenyau 2015. Aku pechaya penyampau kaban berijista ti udah nambah mandangka Riot deka bulih majoriti ke besai ba GE14,’ku Akim.
Kapitan Lee Siaw Hui ke nyadi Ketuai Bagi Orang Indu SUPP pampang Serian madah nengah program ke udah mayuh diatur ungkup orng indu, iya pechaya pengundi orang indu udah nemu bagi politik ti deka ditithka sida.
Riot ba jaku pengelalu nge- lalau SUPP Serian ngambika enda melakang Menteri Besai (PM) Datuk Seri Najib Tun Razak ti udah mayuh mantu Sarawak enggau peranak Sarawak nyengkaum bansa Bidayuh.
Ku iya, PM ke diatu manah agi ari PM ke udah megai penuduk nya pengelama 22 taun tang enda mayuh mantu ngangkatka pengidup peranak Sarawak.
“Penganti iya enda ulih dibandingka enggau YAB PM ti udah meri servis bedau datai setengah ari 22 taun, tang iya udah mayuhmantu kitai Sarawak. Ketegal nya ba maya GE14 tu, kitai meseti nyukung YAB PM,’ku Riot.
“Nadai kebuah kitai patut nyukung orang ti udah nyadi PM pengelama 22 taun tang nadai ngereja pengawa ti tau ngangkatka pengidup peranak Sarawak kelebih agi peranak menua pesisir ti begunaka jalai, klinik enggau spital, sekula nyengkaum kolej teknikel,”ku Riot.