Top Fruits deka mantu Sarawak ngeluarka mayuh agi buah rian

KUCHING: Top Fruits (Sarawak) Sdn Bhd, kemari ngaga kerejasama enggau Perintah Menua Sarawak nengah Opis Menteri Pengawa Betanam Betupi ( MOA), alai kompeni tu nyadi kompeni ‘anchor’ (besai) ke deka mantu produk betanam betupi.

Kepala Menteri Datuk Patinggi Abang Johari Tun Openg madah, buah rian tau nyadi komoditi ke meri peluang besai ke Sarawak alai pengawa tu ulih dikemansangka jauh agi ulih Sarawak.

Kemari, atur pengawa nyain Sempekat Pemereti Ati (MoU) entara Top Fruits Sdn Bhd (Sarawak) MOA, alai sida iya deka berundingka chara ngeluarka mayuh agi buah rian ari menua tu.

“Ke seharitu, kitai ngungkupka ‘khas’ ke buah rian laban buah rian bisi peluang ke besai dalam makit entarabansa lalu kompeni Top Fruits bisi teknologi, nyengkaum peneleba dalam pekara tu, ukai semina dalam pengawa betenam aja tang datai ngagai makit besai.

“Aku nyukung kerejasama tu entara MOA enggau Top Fruits,” ku Abang Johari.

Iya madah munyi nya lebuh bejaku ba aum media pengudah ngepunka MoU entara MOA enggau Top Fruits Sdn Bhd (Sarawak) di Palan Konvensyen Penview ditu,kemari.

Ke pemungkal iya, Abang Johari madah buah rian entara komoditi ke besai endar peluang, alai MOA ngena teknologi ‘drone’ ngiga sitak ke manah ke ulih alai bekebun rian.

“Drone deka ngambi gambar data nyengkaum bansa tanah ke manah alai nanam buah rian ngambika buah rian ulih ditanam chara sistematik ulih pekebun mit , nyengkaum pekebun besai.

“Data tu ulih dikena kitai bekebun buah rian dalam timpuh ke panjai laban pemanjai umur buah rian dalam urung 25 taun, udah nya, kitai ulih nanam buah rian baru, lalu ditambah agi enggau penguntung ari industri bukai ketegal buah rian,” ku iya.

Abang Johari ti mega nyadi Menteri Wang enggau Perambu Ekonomi nandu baru madahka kitai di menua tu ngembuan empas ke mayuh ari buah rian.

“Aku kala madah, kitai mega ulih ngiga peluang bukai nengah buah bukai ke bisi ditanam kitai di menua tu, nyengkaum buah nyiur ke besai endar peminta diatu,” ku iya.

Polisi kitai diatu ku iya, iya nya mekuh teknologi, pengeluar produk nya laban kitai ulih ngena teknologi digital dalam sukut ngeluarka produk kitai sereta ngena teknologi lebuh kitai deka nyual produk kitai (makit).

“Semua ngena ekonomi digital laban chara bansa tu ke meruan sereta ngipak dalam sukut ngeluarka produk ke mayuh.

“Diatu kitai bejaku pasal chara bekebun, reti nya, kitai bisi data, lalu kitai ulih mutarka data nya, lalu data nya ulih ngajar kitai merambu pengeluar produk.

“Enti teknologi nya dikena di Sarawak, laban kitai bisi tanah, sereta gaya mua hari ke manah, Sarawak ulih nyadi palan ( hab) pemakai ke Malaysia tauka ke sitak menua tu, laban penyampau mensia ke diau di menua tu enda mayuh, tanah kitai besai, kitai ulih ngena teknologi, lalu ngujungka ketau kitai pan mayuh. Lalu kitai ulih nyadi pengeksport buah ngagai dunya,” ku iya.

Enti kitai ulih nyadi pengeksport buah ngagai menua luar, kitai enda tau enda ngena digital teknologi, kelebih agi dalam sukut pengeluar sereta makit, ku iya.

Ba lansa bukai, Abang Johari ti mega nyadi Menteri Pemansang Mengeri enggau Rampa Menua madah bera- tika gaya rampa menua kitai pan nyau berubah, kitai enda tau enda nguingka tuju kitai, ngambika barang produk betanam betupi ke dikemisi kitai, deka nyadi pemisi ngagai rayat menua tu.

“Kebuah iya bansa nya, laban pengawa betanam betupi nyadi siti pampang ke berat di menua tu laban iya bekait enggau mensia mayuh, lalu pampang betanam betupi tu mega ngeluarka asil, pemisi ekonomi ke dikeluarka lalu nyadi penatai pemisi ke besai ngagai orang ke ngereja pengawa betanam betupi di menua tu.

“Bepelasarka tu mega, deka ngemanahka GDP kitai, dalam sukut emisi nengah GDP. Lalu ketiga, kitai ngena chara baru, ngambika kitai ulih nyual produk kitai ngagai makit ke besai agi,” ku iya.

Sebedau nya, Sapit Kepala Menteri ti mega nyadi Menteri Pengawa Betanam Betupi Moden, Tanah Adat (NCR) enggau Pemansang Menua Pesisir, Datuk Amar Douglas Uggah anak Embas madahka, naka kediatu, MOA benung ngaga survei beratika sitak ni ke manah alai bekebun buah rian.

“Diatu, MOA benung beratika sitak ni ke manah alai bekebun rian, asal tananh nya ukai alai geturung pendiau tauka alai berumah, tauka sigi tanah puan ke lalu bedau alai betanam tauka bekebun.

“Beri kami timpuh entara dua ngagai tiga bulan tu baru MOA ulih madahka endur ke deka alai bekebun rian bedandang besai,” ku Uggah.