Sida dipinta bekerejasama enggau apai indai nemu bagi nembiak ti bisi penyelai pendiau
SIBU: Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Dato Sri Fatimah Abdullah meransang mayuh agi pengemeran pengerai enggau perubat gawa nyadi siti tim enggau pengajar sereta apai indai ngambi ngelala bala nembiak mit ti bisi penyelai pendiau.
Iya ngaku ke alai pengawa ngelala bala nembiak mit enggau peminta khas nyadi penanggul ti mar endar kelebih agi berundingka konteks menua pesisir.
Ku iya, bisi sekeda pengemeran perubat ti sanggup datai ngabas klinik desa mantu ngelala enggau mendiagnosis nembiak mit bisi peminta khas.
“Pengudah nembiak mit tu bisi bisi penyelai pendiau didiagnosis tumu agi, sida tau diberi program intervensyen tumu lalu asil nya deka manah agi,” ku iya rambau bejadika Special Education Network in Malaysia (SENIM) Conference 2017 di Woodlands International School.
Bisi lebih 400 iku pesereta ari serata Asia ngambi bagi ba gempuru besai dua hari ti diatur ditu ungkup keterubah iya, berambaika jaku Awareness, Support enggau Inclusion.
Ku Fatimah gempuru besai nya nyadi pengawa ti besai endar reti ngagai Sarawak nyadi tuai rumah keterubah iya aum besai diatur di luar Kuala Lumpur.
Antara sida ti ngambi bagi dalam gempuru besai nya iya nya apai indai nembiak mit ti bisi peminta khas, raban profesional perubat enggau pelajar, bala pengajar ari palan pelajar tinggi ti ngambi kus bekaul enggau pelajar peminta khas, bala pengajar pelajar tumu nembiak mit, bala staf ngintu pengelantang rama enggau palan pemulai pemanah ulah.
Fatimah minta bala pekereja, bala pengajar, pengemeran pengerai enggau perubat ti napi pemar nentuka servis inklusif ti meruan sereta lestari ngagai bala nembiak mit ti bisi peminta khas.
Ku iya, pemar bukai nyengkaum pekara belanja, kurang pengajar ti ulih nangkup peminta bala nembiak nyelai pendiau, nyediaka akses ngagai pelajar inklusif, kualiti servis, ngemai ngasaika peneleba rama ti ngemai reti ngagai bala nembiak mit enggau penanggul infastruktur.
“Taja pia, baka ti udah disebut aku tadi, pemar ukai penekul lalu iya ulih diputar nyema kitai bisi ulah ti betul lalu tu iya nya penyedar kreatif,” ku iya ke mega Kaban Kunsil Nengeri ( ADUN) Dalat.
Lebuh meri penyedar, ku Fatimah, pekereja ukai semina patut meri penyedar aja ngagai sida tang mega ngagai orang bukai enggau mensia mayuh.
“Lebuh kitai meri penyedar, kitai patut nerenakka ulah ti betul lalu bala anak patut berengkah ari renggat pra sekula,” ku iya.
Ku Fatimah, pengajar eng- gau pelajar patut nampung pengawa sereta ngerembaika penemu sida ngambika sida nemu chara pemadu manah ngelala sekula enggau nyukung bala apai indai nembiak enggau peminta pelajar khas.
Ba pekara tu ku iya, opis menteri iya deka meri kerejasama enggau sebarang gempung ti deka ngatur gempuru pelajar khas ngambika sida ulih matak penyereta mayuh agi kelebih agi sekula-sekula ke bukai.
Fatimah mega madahka diri lantang endar ati laban Woodlands International School udah ngaul diri dalam gempuru besai nya lalu ngumbai iya siti pengawa ti chukup manah.
Ku iya, bisi tiga peratus nembiak mit nyelai pendiau raya lalu 10-15 peratus nembiak mit ke bukai bisi sekeda penanggul belajar baka disleksia, ADHD, autisme, bisi penanggul ninga/meda, kusut runding, enggau ke bukai.
Sarawak bisi urung 800,000 nembiak biak ari 18 taun enggau 18 peratus tauka setara enggau 144,000 nembiak di dalam komuniti enggau sekula begunaka bantu tambah di dunya, lebih ari 1 biliun iku di serata dunya bisi sekeda bansa penimpang pelajar.
Sama bisi datai Chairman Kaunsil Mengeri Sibu Datuk Tiong Thai King ke mega ADUN Dudong enggau Residen Sibu Hii Chang Kee. KUCHING: Komiti pengatur pengawa Gempuru Likun Tanah NCR ke deka digaga seharitu (13 Nov) ngelalau penyereta ke ngagai gempuru tu nitihka atur baka ke udah dipadah ulih Opis Kandang Menua (PBT) ke beratika pengelikun penyereta sereta mensia mayuh bukai.
Dalam surat ke dikirum ngagai Bilik Berita, raban pengatur Gempuru Tanah NCR mega minta opis ke bisi endur alai orang asal gawa, ngelepaska pengereja pengawa sida iya sekejap lalu sama enggau nyukung gempuru tu di Kuching Waterfront ditu.
“Kami udah ngaga semua pemerat ke patut digaga dalam kapasiti kami empu, beratika peminta sereta pemerat baka ke udah dibantai PBT. Penyereta ngagai gempuru tu ditagang mai anak mit , penyereta dilalau enda tau mai senjata taja pan orang asal ke datai ngagai gempuru tu nurun ngena pakaian tradisional sida iya.
“Kain rentang tauka ‘banner’ pan enda dikemendarka, tauka mandangka sebarag logo tauka kelai parti politik sida iya, NGO tauka gerempung. Lalu nambah enggau nya mega, sebarang leka jaku ke nganu kort tauka leka jaku ke enda lantang ati enda dikemendarka.
“Arapka semua kitai bebasaka hak orang asal (Indigenious People tauka IP) ke udah ngatur gempuru tu ke komuniti orang asal,” ku pengari gerempung tu, Bill Jugah.
Kebuah meri jaku lalau nya ku Bill, laban enggaika PBT enda pechayaka atur pengawa bansa tu (jemah ila) sebuah gempuru ke likun ke semina deka mai orang asal begempuru, mantaika ati ke enda lantang bekait enggau tanah NCR sida iya.
“Awakka aku ngelalau kita iya nya gempuru tu deka madahka peminta kitai ba hak kitai dalam NCR, iya nya Pemakai Menua (PM) enggau Pulau Galau (PG).
“Kitai enda ulih meri kuasa kitai bekait enggau hak tanah kitai ngagai parti politik sereta Perintah.
“Tu maya iya kitai (gauge) sentiment rayat Sarawak, tu maya iya semua rayat Sarawak samasama begempung enda ngira ni bagi parti politik kitai, bansa sereta penuduk sosial kitai. Tu maya iya gempung orang asal, kitai beserakup madah ngagai Perintah tu nyawa rayat menua tu,” ku iya.
Bala penyereta mega dilalau mai ai irup sereta utai pakai sida iya empu, lalu ke berat agi, bai beg uras ngambika ulih alai bala mayuh bebuaika uras abis timpuh gempuru nya pagila,” ku iya.
Dipelabaka urung 100 orang ngatika diri deka mantu polis beratika gempuru tu deka digaga enggau likun enggau manah.
Pengudah nembiak mit tu bisi bisi penyelai pendiau didiagnosis tumu agi, sida tau diberi program intervensyen tumu lalu asil nya deka manah agi. Dato Sri Fatimah Abdullah Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit