Bup Pengingat Tuai-Taju Remaong Telian-2 ngundan jerita pengingat tuai Iban kelia
SIBU: Casper Kayong Umping, seiku penulis bup Iban datai baru enggau bup Pengingat Tuai-Taju Remaong Telian-2 enggau bup Jaku Klasik Iban.
Bup Pengingat TuaiTaju Remaong Telian-2 nampung bup keterubah iya nya Pengingat Tuai Telian-1.
Serak tu, bup nya ngudan tiga bengkah jerita pengingat tuai Iban kelia ti dipadahka iya dibai aki ini peturun bansa Dayak-Iban ke pindah ari Batang Kapuas, Kalimantan Indonesia ngagai Sarawak urung beratus taun menya.
“Jerita Taju Remaong tu endang amat nyadi di Batang Kapuas menya laban maya nya agi semak antu.
“Bup tu dikarang aku nitihka ditusi siku kaban Manang suba ngambika semua kitai nemu magang nama ke dikumbai Taju Remaong,” pia ku iya maya berandau enggau pengarang berita.
Bekunsika sekeda ari tibak jerita tu, ku Kayong, agi kelia menya, mayuh bendar orang indu ke kena taju jelu remaung tang dikumbai orang ke enda meretika jerita tuai Iban, Taju Remaong semina siku aja remaung.
“Kebendar iya, lebih 10 iti jerita Taju Remaung ke enda sama laban orang indu ke kena taju jelu tu ukai siku aja.
“Nama jelu ke naju orang indu nya enda mega sama kelimpah orang ke indu kena taju mega ukai siku mensia aja,” ku iya nerang.
Kelimpah ari Taju Remaong, bup 108 lambar tu mega bisi jerita tuai ke bukai baka Peturun Antu Gerasi enggau Bajan Enggau Bunsu Rabing.
Serak tu mega Kayong bisi ngeluarka bup Jaku Klasik Iban baru.
Bup tu ku iya mandangka mayuh bagi perugan chabang leka jaku asal Iban baka belajarka Jaku Pelasar, Jaku Begeliga, Jaku Nanya Indu, Jaku Melah Pinang, Jaku Karung, Jaku Kelaung enggau mayuh bansa jaku ke bukai.
Rega bup Pengingat TuaiTaju Remaong Telian-2 iya nya RM17 siti lalu bup Jaku Klasik iya nya RM20 siti.
Dua iti bup tu tau dibeli ba kedai bup di mengeri Sibu.
Taja pan baka nya, barang sapa ke deka meli bup tu terus ari Kayong tang meseti lebih ari 10 iti tau betelefon ngagai iya nengah lumur 019-814 2510.