Pekebun lada ulih ngeripot pekara bekaul lada ngagai Opis Betanam enggau MPB

JULAU: Sida ke betanam lada ba pelilih Pakan enggau Julau dipinta ngeripot ngagai Opis Betanam tauka Opis Lada Malaysia (MPB) nyema lada sida bisi sakit ti tau ngujungka lada mati.

Kaban Parlimen (MP) Julau Datuk Joseph Salang Gandum madah, ari tu piak bekaul ulih mansik kebuah lada nya sakit baikka campur sum tauka rachun enda engkeman tauka bisi kebuah bukai.

“Kitai bisi ninga berita madahka lada ke ditanam ba Julau enggau Pakan ditu bisi sakit lalu bisi mega udah mati.

“Ketegal nya kitai minta kita ngitung lada kita ke sakit nya lalu padah ngagai Opis Betanam tauka Opis Lada ke besemak,” pia ku iya madah maya Pengerami Pemesai Begulai enggau Rayat ba Rumah Unjah Mani, Nanga Luau di Julau, empai lama tu tadi.

Ku Salang, kerejasama semua orang ke bekebun lada beguna bendar dikena mutarka penanggul ke bisi nyadi nya.

Iya madah, ripot ari orang bekebun beguna dikena Opis Betanam tauka MPB mansik pun penyakit lada nyadi.

“Enti ditejuka baka nya aja, dia kita deka rugi besai laban pun penyakit lada enda ditemu ngujungka lada mega deka mayuh agi sakit.

“Ari pansik opis bekaul sida deka nemu pun penyakit lalu ngiga chara dikena mutar,” ku iya madah baru.

Ba pekara bekaul, sitak Sarikei dipadahka pemadu mayuh lada di Sarawak alai ba ba taun 2016 aja sitak tu ngasilka 9,084.2 tan metrik enggau pemesai tanah 5,098 hektar endur belada.

Penyampau tu mungkur pelilih Sarikei (810 hektar), Julau (1,934 hektar), Pakan (1,958 hektar) enggau Bintangor/Meradong (396 hektar).

Pekara tu dibantai Sapit Menteri Kebun Dandang Besai enggau Komoditi Datuk Datu Nasrun Datu Mansur maya ngulu Seminar Penggredan Lada Dan Penghasilan Lada Berkualiti di Rumah Segan Jubin, Engkamop, Julau, empai lama.

Dikena meransang pengawa belada, perintah nengah MPB nyediaka bantu baka sum, ‘dolomite’, bantu paung lada enggau tuat, injin dikena nungku, injin dikena muput lada enggau ‘spiral separator’ ba baruh Program Pemansang Bekebun Lada.

Ba taun 2017, penyampau bantu ke diterima sitak Sarikei iya nya RM1.5 juta ungkup kebun lada 57 hektar enggi 570 iku orang bekebun.

Ari penyampau nya, pelilih Julau diungkupka RM520,000 dikena nyaup 200 iku sida ke belada ba pemesai tanah 20 hektar.

Pelilih Pakan mega nerima bantu sepenyampau RM650,000 ungkup 25 iku orang bekebun lada ba pemesai kebun 25 hektar.