Perintah seruran nyukung pengawa ke ulih nyungkak penyulut nembiak

MIRI: Perintah seruran meri sukung ngagai apai indai enggau bala pengajar ba pengawa nambahka penyulut bala anak sida dalam bidang akademik enggau kokurikulum.

Ketuai Operasyen Biro Sebana Mensia Mayuh, Parti Sa’ati Rayat Sarawak (SUPP) Miri, Erick Chin madah kerejasama antara apai indai enggau bala pengajar beguna endar dikena nentuka pemujur bala nembiak dalam pelajar enggau lumba.

“Kitai ngarapka Gerempung Apai Indai enggau Pengajar (PIBG) genap sekula bejalaika pangku pengawa nambahka penyulut akademik enggau kokurikulum di sekula,” ku iya.

Erick bejaku ngarika Menteri Muda Dagang Temuai, Seni enggau Main Asal, Datuk Lee Kim Shin rambau Pengerami Makai Lemai Ninting Taun Sekula Primari St Joseph Miri malam kemari.

Erick madahka gempung PIBG ti tegap di sekula beguna endar ngambika tetiap penanggul nembiak sekalika ba akademik tauka infrastruktur diputar enggau meruan agi,” ku iya nerang.

“PIBG ulih bejalaika tanggungpengawa enggau efisien agi nyema apai indai enggau bala pengajar bekerejasama dalam siti tim sereta gawa nambahka penyulut sekula,” ku iya.

Erick mega ngarapka Sarawak bulih kuasa au- tonomi dalam bidang pelajar ngambika sistem pelajar di Sarawak ulih dilangkar nitihka gaya chuan Sarawak empu.

“Sarawak ngangkatka Jaku English (BI) nyadi batang jaku lalu nyema iya dikemeran dalam sistem pelajar, kitai pechaya peranak Sarawak landik BI,” ku iya.

Berebak enggau nya, bala nembiak di menua tu meda enda mudah mantul ati enggau sistem pelajar ti nadai bekaul enggau pemar pengidup di Sarawak.

Iya mega muji pangku pengawa enggau jasa pengajar St Joseph ba pengawa ngajar enggau nyeridi bala nembiak datai ba tikas ti ngemegahka sekula.