SMK Bintulu mujur nerima sekeda anugerah nyerumba APKRN 2017

BINTULU: Sekula Sekondari (SMK) Bintulu mujur bulih sekeda anugerah rambau pengerami Anugerah Penyulut Kurikulum Renggat Nasional (APKRN) 2017 ke diatur di Balai Bukit Kachi, Universiti Utara Malaysia Kedah apin lama ke udah.

Sekula mujur bulih gelar champion ba kategori Sekula Nyulut Kokurikulum - Sekula Sekondari Mengeri.

Nembiak iya, Joel Laing Luyoh mega teulihka penuduk lumur dua dalam kategori lelaki ‘Nembiak Nyulut Kokurikulum - Sekula Sekondari.

Seraya ba kategori indu, Jocelyn Neo Hui Lyn menggi penuduk kelima.

Nangkan nya, pengajar Ling Sim Hie menang penuduk kelima ba kategori Pengajar Nyulut Kurikulum - Sekula Sekondari.

Ngarika sekula nya, prinsipal iya, Ananthan Subramaniam meri terima kasih ngagai semua nyengkaum Kaban Parlimen (MP) Bintulu Datuk Seri Tiong King Sing, Menteri Bekal Ai enggau Elekterik Menua Pesisir Dato Sri Dr Stephen Rundi Utom, bala apai indai, pengajar, nembiak, komuniti menua nya sereta ejensi perintah ti udah ngemujurka program kurikulum ungkup sekula.

“Raban sekula mega deka meri terima kasih ngagai Serakup Apai Indai enggau Pengajar (PIBG) ti seruran meri peransang enggau sukung belanja ngagai aktiviti sekula kelebih agi dalam program sekula ngaul nembiak ti besemekih enggau Semenanjung Malaysia sereta menua tasik,” ku Ananthan.

Prinsipal mega berasai lantang enggau penyapai nya laban iya begunaka lima ngagai enam taun endur ngatur pengawa kurikulum ti tegao sereta pemadu manah antara sekula sekondari di mengeri di Malaysia.

“Pemujur tu asil ari peninggi komitmen, pengepuh, penau, enggau sukung nadai bebagi ari semua raban.

“Aku pechaya penyapai tu deka meri peransang ngagai SMK Bintulu ngagau ubah ti besai ba penempa ulah nembiak enggau pemintar sida berunding kelimpah ari nempa pemanah nama sekula, Bintulu enggau mega pelajar nengeri,” ku Ananthan madah.

Ari pemujur tu ku iya, SMK Bintulu udah nyenggala ngayanka sekula bukai mega ulih nyapai pemujur ti ngelui ari ke patut enggau pengeran gawa.