Bajet 2018 pemadu manah laban mungkur semua pekara, ku Ugak
KAPIT: Kaban Parlimen (MP) Ulu Rajang Datuk Wilson Ugak Kumbong madahka Bajet 2018 iya ti komprehensif enggau sistematik. Iya ngasaika tu pemadu manah naka ke diatu lalu nyengkaum semua pekara pelajar, ekonomi rama menua tu.
Taja pia, lebuhka bejaku ba parlimen apin lama ke udah bejuraika Bajet 2018, Ugak nyemetak madahka pemansang penyikap perengka guna pemun enggau infrastruktur patut digaga enggau jampat di sitak Ulu Rajang enggau Kapit.
Ugak ngerintaika pemansang ti patut digaga enggau jampat iya nya ngangkatka tikas pengerai di menua pesisir, sambung jalai ari Nanga Mujong ngagai Ga’at Baleh, bekal kuasa karan 24 jam enggau bekal ai paip beresi, sekula enggau pelajar, sereta ke bukai.
Ba pekara ngintu pengerai, iya berasai asa kenyau ari taun 2013, iya nyadi MP Ulu Rajang, tetiap kali parlimen baum, iya suah udah madah pematut ngubah tikas pemanah pengawa ngintu pengerai di menua pesisir.
Iya sinu mega ngelama tu tikas pengerai di menua pesisir semina ngambi nama aja ke bisi lalu bajet ngintu pengerai dipeda semina beratka Semananjung Malaysia aja.
“Kapit begunaka sepital baru dikena nangkup peminta penyampau tubuh peranak ti majak nambah.
Pengawa ngaga Tekat Ai Baleh enda lama da agi lalu dua taun ari diatu, kitai melabaka pekereja ( ngaga Tekat Ai Baleh) urung 4,000 ngagai 5,000 iku) sereta ditambah enggau sida sebilik, penyampau tubuh deka nambah.
Pengawa ngintu pengerai patut ditambah seriris enggau penambah aba peminta,” ku iya.
Ku Ugak nerang, semua Bagi Menua Kapit di Ulu Rajang ti mungkur 1/3 ari pemesai tanah Sarawak.
Tang sinu, semina bisi Sepital Kapit aja ti dipejalaika Mission Methodist, digaga dalam taun 1953. Pengudah nya baru diambi Opis Menteri Pengerai Malaysia dalam taun 1976. Semina bisi 134 katil sereta suntuk servis pakar.
Iya ngapil ngambika bala pakar ba servis pengerai dianjung gawa ngagai Kapit sereta nambahka penyampau injin hemodialysis, Poliklinik Song, Poliklinik Belaga enggau Poliklinik Sungai Asap laban pesakit majak nambah.
Iya nikalka kenang penemuai gawa tiga hari berunggu Sapit Menteri Pengerai ngagai Kapit kena 15 Oktober, ngambika ulih meda empu pengawa ngintu pengerai semina ngambi nama aja.
Ugak minta perintah bejalaika infrastruktur pemun, bekal kuasa karan ngagai menua pesisir.
“Kapit nyadi menua pemadu ulu sereta rumah kuasa Sarawak. Tekat Ai Bakun 2400 megawatt, Tekat Ai Murum 900 megawatt lalu ti deka datai Tekat Ai Baleh 1350 megawatt.
“Tang sinu endar, peranak di menua nya ti mindah ngagai palan pengentap baru pendiau (Sungai Asap) dikena meri jalai ngagai tekat ai Bakun semina ulih meda Tali Karan mansa rumah panjai sida aja, tang nadai nerima bekaul kuasa karan ti mudah,” ku Ugak.
Iya nerima Skim Bekal Kuasa Karan Menua Pesisir (RES) RM620 juta ti ngaul 10,000 buah rumah panjai di menua pesisir.
Iya ngarapka rumah panjai di Ulu Rajang ngasaika penguntung ari agih belanja tu.
Iya mjega ngarapka enda lama da agi rumah panjai deka disambung sekalika ari sistem Grid Nengeri tauka remote cluster ari Panel Kuasa Solar ti dilekat di rumah panjai.
Senentang pengawa nyukat kelinggi tanah Adat Bansa Asal (NCR) – ku Ugak, iya endang nerima agih belanja penyampau RM30 juta dikemendarka Najib ungkup pengawa nya.
Ku iya nerang, tanah ba komuniti Dayak endang chukup berega. Bansa Dayak diau di menua pesisir sereta beridup ba atas tanah. Tang diatu, nadai pala tanah, nadai jalai ulih minta bemacham skim betanam betupi kelebih agi ari RISDA – minta bantu nanam getah tauka sawit.
Ku Ugak, sekula menua pesisir di selampur nengeri patut dikemanah ba penyikap perengka guna pemun enggau infrastruktur. Di Sarawak, bisi 369 ari 403 buah sekula bepanggai ba injin api ngulihka bekal kuasa karan. Pia mega, servis tali karan ti udah kelalu lama lalu bala nembiak nadai bulih sambung internet.
Ugak mega nerima agih belanja penyampau RM1 biliun ungkup sekula di Sarawak tang iya ngasaika penyampau nya enda chukup dikena ngangkatma pemanah sekula menua pesisir sebaka enggau sekula di mengeri.
Ku iya, nembiak di nengeri, sida udah bisi sambung internet dikena belajar online sereta ngiga penerang pasal pelajar. Sigi amat bisi makmal komputer tang nadai sambung tali karan sereta nadai internet. Nya kebuah, pedis endar deka nyapai pemutus ti manah laban di mengeri semua bisi, tang nadai dikembuan menua pesisir.
“Aku chukup sinu bisi pengajar ari Semananjung Malaysia dianjung ngajar di sekula menua pesisir. Pengudah setaun dua, sida minta pindah. Pekara tu endang enda manah ngagai bala nembiak.
“Nya alai aku ngansak Opis Menteri Pelajar enggau Opis Menteri Pelajar Tinggi matih mayuh agi peranak menua tu nyadi pengajar. Pengudah graduet, anjung sida ngajar ngagai menua diri, ngambika sida ulih lama ngajar dia laban sida ngasaika diri ngempu sereta meretika gaya pengidup enggau adat di menua nya.
“Tambah mega, juluk Nengeri deka nyapai nisbah 90:10 antara peranak menua tu enggau pengajar Semananjung.
Nangkan nya, ba pekara jalai ku iya, dua tiga taun ari diatu, bisi jalai ari Nanga Mujong ngagai Nanga Antawau, Putai tana Tekat Ai Baleh. RM 1.2 biliun udah diagih dikena ngaga jalai sepemanjai 73 kilometer.
Taja pia ku iya, baka ni ari Kapit ngagai Sungai Ga’at nadai jalai. Iya minta perintah ngaga jalai ari Nanga Mujong ngagai Rumah Tunku, Nanga Ga’at urung 73 kilometer penyauh.
Iya mega minta program Jiwa Murni ngemanahka jalai batang ari Belaga ngagai SK Losong Laku, urung 32 kilometer penyauh.
Ba pekara BOMBA, Ugak minta perintah ngaga Opis Bomba di Pasar Belaga enggau Skim Pengentap Baru Pendiau Sungai Asap. Ku iya, Opis Bomba enggau Penyah Penusah endang patut digaga di Sungai Asap laban rumah panjai nya digaga ari kayu.