Tekad Ai Bengoh agi likun, nadai tiris: Dr Rundi

KUCHING: Tekad Ai Bengoh agi mengkang likun lalu ukai baka berita selebubu ngapa ti disadung ba media rama ke madahka tekad ai nya baka ke enda tegap agi.

Menteri Utiliti Dato Sri Stephen Rundi Utom madah bepelasarka ripot ari konsultan, madahka tekad ai nya agi mengkang tegap.

“Enti nitih, langkar sereta pengawa ngaga tekad ai nya nyengkaum peneleba profesional menua tu enggau antarabansa ari United Kingdom enggau China ke udah ngaga 200 buah tekad ai di serata dunya,” ku Dr Rundi.

Tekad ai Bengoh udah beoperasyen kenyau ari taun 2015.

“Ngurangka tikas ai di tekad ai nya baru tu tadi, laban nitihka prosedur baka ke di asuh ulih konsultan tekad ai.

“Sigi udah di perambuka, ngurangka tikas ai nengah ‘draw off culvert’ nya ukai ketegal tekad ai nya buchur tauka rusak. Nya kebuah, integriti tekad ai sigi enda tau sebarang lalu mesti di kemata enggau serius,” ku iya.

Dr Rundi madah munyi nya lebuh bejaku ba aum media di Bilik Media, Aum Kunsil Nengeri ditu, kemari.

Iya nandu baru madahka lebuh ngaga pengawa ba tekad ai, endang bisi sekeda ai deka dipeda lilih.

“Sigi bisi maya ai lilih nengah sambung nya. Tang utai ke diperatika ba palan tu, iya nya ‘ designed contraction joint’, ukai rekah baka ke dipadah ba media rama.

“Sigi lilih dijangka nyadi nengah sambung nya, sereta basah ba sentang ke lilih nya,” ku iya.

Taja pia, nitihka Prosedur Operasyen Standard (SOP), semua tekad ai digaga di serata dunya, sigi udah bisi ‘Emergency Response Plan’ (ERP) ba tiap tekad ai.

“Tang jarang endar nyadi nyema bisi tasah ke nyadi, laban orang ke diau ba sitak tekad ai mesti dipadah enggau jampat, lalu enda tau enda di pindah enggau jampat,” ku iya.

Maya bisi tasah nyadi, ku iya, sigi udah bisi endur alai mindahka mensia mayuh sereta ERP udah disediaka.

“Enti nitih, randau kala digaga bekait enggau ERP digaga ba sebuah hotel ditu (2016) ke di gulu ulih ijinsi Perintah, kunteriktor, konsultan enggau tuai-tuai komuniti,” ku iya.