Aplikasyen nya nyendiaka servis bebayar enda ngena mata duit ke lalu dikena ngenegapka agenda ekonomi digital nengeri
KUCHING: Sarawak Pay ti ditumbuhka perintah nengeri udah mujur dipenyadika Kepala Menteri Datuk Patinggi Abang Johari Tun Openg, kemari.
Berindik ari pemujur nya nyendiaka servis bebayar enda ngena mata duit ke lalu dikena ngenegapka agenda ekonomi digital nengeri, Abang Johari bisi juluk ati deka ngelanjarka kaul Sarawak Pay ngena transaksyen elektronik-wallet (ewallet) ke menua luar ke sama bisi ngena e-wallet.
“Kitai ngarapka Sarawak Pay ulih dilanjar ngagai sektor peribit kelimpah ari juluk kitai deka ngelanjarka Sarawak Pay ngena transaksyen ewallet ngagai menua bukai baka menua ke sepiak kitai baka Indonesia enggau Thailand.
“Taja pia, bekaul enggau nyambung transaksyen e-wallet ngagai menua bukai, kitai deka minta pemendar ari Bank Negara Malaysia (BNM) dulu,” ku iya.
Abang Johari mansutka penemu nya lebuh ti bejaku ba pengerami bejadika Sarawak Pay ti diatur ba Autrium Kompleks DUN ditu, kemari.
Sarawak Pay tauka e-wallet ti diberi lisin ari baruh PaymentGalaxy Wallet sereta dipegai BNM, ukai semina e-wallet keterubah dalam Perintah Nengeri Sarawak tang mega e- wallet keterubah ditumbuhka perintah nengeri di menua tu.
Dikena ngepunka e-wallet Sarawak Pay, diatu BNM semina ngemendarka tetiap kali ‘top-up’ semina ulih naka RM200, tang taun baru, perintah nengeri deka minta ngagai BNM ngambika penyampau nya ulih tambah ngagai RM1,500.
Bepelasarka penerang berita, Sarawak Pay bisi ‘Scan & Pay’ ke alai lebuh ke deka bebayar berengkah enggau dirimbas enggau kod QR ke bisi ba bil kod QR ke bisi diayanka hotel SEDC.
Ba renggat keterubah dikena ngepunka Sarawak Pay, ‘Scan & Pay’ semina ulih dikena ba bil tauka ‘oulet’ baka bil ninting bulan ari Sarawak Energy, bil ninting bulan ari Lembaga Air Kuching, chukai pintu semua 26 opis kaunsil kandang menua, hotel Grand Magherita (10 outlet) enggau hotel Riverside Majestic (14 outlet).
Abang Johari mega madahka Sarawak Pay ditumbuhka ukai dikena ngemegahka diri ngagai menua bukai ngambika Sarawak dipeda bepengelandik ba teknologi tang ku iya, aplikasyen baru nya dikena napi peminta tauka juluk raban biak peranak Sarawak sereta kelebih agi mensia mayuh nengeri tu.
Iya madah, perintah nengeri ti bejadika Sarawak Pay mega setipak enggau di serata dunya ke benung ngubah chara bejalaika transaksyen dagang.
“Jemah ila iya nya orang biak, lalu kitai ti numbuhtu ukai ungkup kitai tang ungkup raban biak ngambika ulih ngerengkun peluang ekonomi dunya.
“Kitai nadai ‘ ubat’ tang ngerengkun teknologi dikena kitai bebendar ngemansangka nengeri sereta meri gaya pendiau ti manah jemah ila.
“Juluk kitai deka nyadi nengeri maju lebuh manggai ba taun 2030, kitai semina tinggal 30 taun agi ari sehari tu. Enti kitai enda berubah diatu, aku enda nemu nama utai ke nyadi dalam 13 taun ke deka datai,” ku iya ngenang pekara nya ba pengerami nya.
Kelimpah ari nya, bepelasarka penerang berita taun baru perintah beperambu deka ngerembaika karekter ‘Scan & Pay’ nya ngagai semua ejensi perintah sereta bil enggau ke bukai di nengeri tu.
Perintah Sarawak mega deka minta ngagai BNM ngambika karekter baka Wallet Transfer, Pay anyone, Go Dutch, Supplementary Wallet enggau Standing Instruction ulih dikena dalam Sarawak Pay.
Sama bisi ngulu pengerami nya, kemari Sapit Kepala Menteri Datuk Amar Douglas Uggah Embas enggau Tan Sri Datuk Amar James Jemut Masing, Sekretari Perintah Nengeri Tan Sri Datuk Amar Mohamad Mor-
Kitai ngarapka Sarawak Pay ulih dilanjar ngagai sektor peribit kelimpah ari juluk kitai deka ngelanjarka Sarawak Pay ngena transaksyen e-wallet ngagai menua bukai baka menua ke sepiak kitai baka Indonesia enggau Thailand. Datuk Patinggi Abang Johari Tun Openg Kepala Menteri Sarawak
shidi Abdul Ghani, Menteri Wang Kedua Dato Sri Wong Soon Koh enggau kabinet nengeri, ketuai opis perintah engga ke bukai.