Tu semina deka ngenyarutka rayat menua tu kelebih agi di Sarawak
KUCHING: Parti Bansa Dayak Sarawak Baru (PBDSB) beratika endang nadai pematut ngeletakka ukum RM1,000 ngagai sida ti ngena Jaku Malaysia enggau salah, nyengkaum ba iklan ‘on-line’.
KelebihagiperanakSarawak endang enda setujuka ukum RM1,000 ti dipelaba deka diteritka Dewan Bahasa dan Pustaka (DBP), pengudah ubah ba Akta Bahasa Kebangsaan 1993 enggau Akta Pendidikan 1996 dikemendar di Parlimen, pia ku Presiden PBDSB Cobbold John Lusoi kemari, nimbal penerang pemadu baru, ti dibantaika dalam ripot dalam portal berita ‘on-line’.
Ripot nya madahka perambu deka dipejurai bala komiti kabinet khas betuaika Sapit Menteri Besai Ahmad Zahid Hamidi, lalu patut bisi sempekat, Opis Menteri Pelajar deka mantaika ubah ngambika DBP ulih neritka pejalai ukum.
Jaku dipansutka Direktor Besai DBP Abdul Adzis Abas ti madahka perintah bisi merambu deka meri pemendar ngagai DBP bejalaika atur ngagai orang ti ngena Jaku Malaysia enggau salah.
Isu tu ukai ti keterubah dibantai, ku Cobbold nyemetak, penanggul pun taun tu tadi lebuh profesor ari Universiti Utara Malaysia (UUM) Datuk Zainal Kling madahka bala nembiak mit peranak Malaysia patut belajar Jaku Melayu sebedau diberi tingki.
“Diatu, isu tu disebut, ti nambahka penyarutka sentimen tu baru. Nyentukka Menteri Dagang Temuai enggau Main Asal Datuk Seri Mohd Nazri Abdul Aziz nyengala madah dalam penerang iya sebedau tu, Jaku English ulih ngeruga main asal etnik sereta jaku nasional, nya kebuah pemansang Jaku English patut diketu.
“Nazri mega negika DBP nyadi gempung nasional ti nyaga jaku nasional, lalu madahka sida ulih bejalaika sebarang pengawa seagi nya enda ngelanggar undangundang.
“Ba Sarawak, ulah ke bansa tu ngelanggar 18 pekara ditetapka di baruh Sempekat Malaysia 1963 (MA63), baka ni Nazri berani mansutka penerang ke alai perambu ari DBP enda ngelanggar undang- undang?” ku iya nanya.
Cobbold nyemetak madahka Jaku Malaysia seruran nyadi subjek wajib taja di sekula vernakular China enggau India sereta mega di sekula nasional.
“Belajarka Jaku English enggau Jaku Malaysia ulih dipejalai berebak enggau nadai siti nyadi penekul ngagai ke bukai. Jaku English dikelala nyadi ‘lingua franca’ sereta mega jaku dagang antarabansa, ti patut enda dikelaung tauka dikeibuh.
“Mayuh peranak Sarawak diatu mega ngembuan pelajar tinggi sereta bisi penemu pasal MA63 sereta hak penuduk Sarawak ti patut dalam Malaysia.
“Nyema ukum tu diterit enggau mejal orang, tu endang enda patut sereta nadai ngayanka gaya tauka etika menua demokratik menua sekular,” ku iya, seraya ngansak semua menteri perintah besai di Sarawak beratika isu tu.
Diatu, isu tu disebut, ti ngenyarutka sentimen baru. Nyentukka Menteri Dagang Temuai enggau Main Asal Datuk Seri Mohd Nazri Abdul Aziz nyengala madah dalam penerang iya sebedau tu, Jaku English ulih ngeruga main asal etnik sereta jaku nasional, nya kebuah pemansang Jaku English patut diketu. Cobbold John Lusoi Presiden PBDSB