Opis Servis Veterinari, SDC ngatur Program Tuchuk Vaksin Anti-Rabies kena 16 Nov
SARIKEI: Opis Servis Veterinari begulai enggau Kaunsil Pelilih Sarikei (SDC) deka ngatur Program Tuchuk Vaksin Anti-Rabies di Libari Perintah berengkah ari pukul 9 pagi nyentuk pukul 5 lemai kena 16 November tu.
Nitih ku penerang dikeluarka pengatur, sida deka nyediaka servis vaksin antirabies nadai bebayar ngagai ukui semina ba atur program nya aja.
Orang ti ngempu ukui ditangkan mai dokumen pengelala sida ungkup rikod pejalai pengawa, ku penerang nya.
Barang sapa ti deka nemu penerang silik tau betelefon nuju SDC ba lumur 084651201 tauka Opis Servis Veterinari bagi menua ba lumur 084-658129. KUCHING: Siti penanggul ke besai ba sistem pelajar di Sarawak iya nya di nengeri tu ngembuan urung 651 buah Sekula Kurang Nembiak (SKM).
Menteri Pelajar, Sains enggau Pansik Teknologi, Dato Sri Michael Manyin anak Jawong madah penanggul ke ditapi SKM di Sarawak, ku iya, bajet ke diungkupka Opis Menteri Pelajar (KPM) bepelasarka penyampau nembiak di sekula.
“Berindik ari nya, SKM nerima ungkup bajet mimit ngujungka perengka guna, pemisi kurang sereta enda ulih diintu enggau manah,” ku iya.
Iya ke mega Kaban Kunsil Nengeri (ADUN) Tebedu madah di menua ke mansang baka di New Zealand, Ireland enggau Finland, sekula ke mit ngembuan mayuh pemanah kelebih agi sentang kaul ke tegut entara nembiak enggau pengajar.
Sekula tu ku iya (di New Zealand, Ireland enggau Finland) disedia enggau perengka guna sereta pemisi ke nyauka sama enggau sekula bukai di menua nya.
“Nambah enggau nya apai indai di menua ke mansang, ngembuan pelajar sereta ulih meri sukung ngagai anak sida iya.
“Taja pia, di menua ke mansang baka Malaysia kelebih agi Sarawak, SKM napi mayuh macham penanggul,” ku iya.
Iya madah munyi nya lebuh nyimpul jurai iya ba DUN hari ke-6 di Komplek DUN ditu, kemari.
Iya nandu baru madahka kelas ke enda mayuh nembiak enda ransing besemekih enggau pangan diri.
“Ambika chunto, taun tu bisi 417 sekula ke bisi 10 tauka kurang ari penyampau nya ngambi peresa UPSR.
“Tambah mega pengajar ke ngajar nembiak dalam subjek ke berat baka Matematik, Jaku English tauka Sains, ukai pengajar ti ngembuan pengelandik ba bidang nya.
“Nembiak ke deka nyulut dalam subjek tu, sida meseti di latih dalam subjek tu. Enti bisi pengajar ke ngajar subjek ke ukai bidang sida iya, tu ngujungka nembiak nadai ati deka bebendar agi belajar,” ku iya.
Dalam kandang tiga taun tu ke udah ku iya, Sarawak ba tikas ke enda manah dalam peresa sekula perintah.
“Dalam UPSR, Sarawak ba penuduk lumur 14 ba taun 2014, lalu ba penuduk lumur 15 ba taun 2015 sereta taun 2016. “Ba peresa SPM, Sarawak ba penuduk lumur 15 ari 16 (2014, 2015 enggau 2016).
“Ketegal tu, opis menteri kami begulai enggau JPNS, udah ngelala 357 buah SKM di serata menua, ke ulih diberi begulai enggau 126 buah sekula ke besai agi,” ku iya.
Taja pia, sekula ke digempung sereta penyampau sekula besai ke deka dibuka nerima SKM bepanggai ba randau enggau komuniti ke napi penanggul tu.
“Nya alai, aku ngapil ngagai ADUN nyukung pemansang tu lalu meri penerang ngagai komuniti di baruh sida bekaul pemaik anak sida mindah ngagai sekula ke besai agi, sereta pemansang bala nembiak ulih mujur agi jemah ila,” ku iya.