Program SAWAS mutarka penanggul bekal ai beresi ba rumah panjai di menua ulu
KUCHING: Bisi urung 2,700 genturung pendiau tauka rumah panjai di menua ulu Sarawak ke nadai bekal ai irup beresi tauka bedau disambung grid ai.
Menteri Utiliti, Dato Sri Dr. Stephen Rundi Utom madah, opis menteri iya bebendar deka ngenukuka peranak rumah panjai tauka genturung pendiau menua pesisir tauka menua ulu nengeri tu ulih ngasaika bekal ai beresi baka peranak mengeri.
Berindik ari pekara nya, opis menteri bisi ngasilka formula tauka program dikena mantu peranak menua pesisir tauka menua ulu ke bedau nerima bekal ai beresi tauka ke bedau disambung grid ai, ku iya.
“Naka ke sehari tu, kitai agi bisi urung 2,700 genturung pendiau tauka rumah panjai ti nadai ai irup beresi tauka nadai disambung ngagai grid ai dalam timpuh 10 taun ke deka datai.
“Berindik ari pekara nya, opis menteri kami ngatur program Sarawak Alternative Rural Water Supply (SAWAS) dikena nyendiaka bekal ai beresi ngagai kandang menua ulu nya.
“Program SAWAS tu seiti ari program bekal ai ungkup menua pesisir ti patut dipejalaika dikena nyapai juluk bungkur bekal ai ke ulih diirup 100 peratus di Sarawak lebuh manggai ba taun 2025,” ku iya.
Dr. Rundi mansutka pekara nya lebuh ti nyimpul jurai Opis Menteri Utiliti maya aum kedua penggal kedua kunsil nengeri Sarawak Ke-18 ke diatur ba Kompleks DUN ditu, kemari.
Nitih ku iya, SAWAS iya nya sistem bekal ai mikro kediri ti ulih mekal ai irup beresi ke menua ulu ke enda ulih disambung enggau grid ai, ketegal mar.
Kelimpah ari nya lebuh ke ngenang pasal bekal lekterik ke menua pesisir, Dr Rundi madahka opis menteri iya bejalaika inisiatif iya nya Sarawak Alternative Rural Electrification Scheme (SARES).
SARES ku iya dipejalaika dikena nyendiaka bekal lektrik ngagai peranak rumah panjai tauka genturung pendiau ke diau di menua ulu nengeri tu.
Kenyau ari taun nyin kemari ku iya, bisi 58 buah genturung pendiau tauka rumah panjai ti mungkur lebih 1,400 ruang bilik ke bisi 7,700 iku peranak bulih pemaik ari SARES.
“Taun tu dipelabaka 32 buah rumah panjai tauka genturung pendiau ke bisi urung 700 ruang bilik ti mungkur lebih 3,000 iku peranak deka disambung lektrik lalu ngasaika pengelantang nengah skim nya.
“Lebuh SARES udah mungkur semua dalam taun 2020, lebih 320 genturung pendiau tauka rumah panjai di menua ulu nengeri tu disambung bekal lekterik 24 jam nengah pengawa nyambung nengah sistem mikro hidro enggau communitybased solar,” ku iya.