Dua buah sepital ke baru digaga enda tembu nitihka timpuh ti ditetap
KUCHING: Dua buah projek sepital di Sarawak ke benung digaga diatu ari baruh kemata Opis Kereja Malaysia (JKR), iya nya Sepital Sri Aman enggau Petra Jaya.
Menteri Pengawa Berumah ti mega Menteri Opis Kandang Menua (PBT) Datuk Prof Dr. Sim Kui Hian madah, naka 22 Oktober tu Sepital Petra Jaya diatu semina udah tembu 27.68 peratus.
“Sepital Petra Jaya enti nunda udah tembu dalam bulan November 2016. Kunteriktor ke ngaga sepital nya dilanjarka timpuh (EOT), lalu timpuh sepital nya patut tembu dilanjar ngagai 9 Jun 2017.
“Diatu, JKR Malaysia benung beratika projek nya tembu enggau lengkas ngambika ulih meri pengelantang ngagai mensia mayuh ba kandang menua tu,” ku Dr. Sim.
Iya madah munyi nya lebuh nyimpul jurai ba Aum Kunsil Nengeri hari ke-6 di Komplek Kunsil Nengeri ( DUN) ditu, kemari.
Ku iya baru, Sepital Sri Aman naka 28 Oktober 2017 tu semina tembu 23.40 peratus dibanding enggau pemansang projek ke patut udah manggai 41peratus.
“Timpuh sepital Sri Aman tu patut tembu ke bendar, iya nya 25 Oktober 2018.
“Enggau pemendar timpuh nya dilanjarka (EOT) JKR, timpuh nya tembu diatu dilanjar ngagai 3 Ogos 2019,” ku iya.
Iya mega madah, Sarawak nadai agi napi penyakit Rabies, manggai ba 1 Julai 2017 tu tadi, ke alai Opis Pengerai Sarawak (JKS) semina ngeripot 6 iti kes ke ditetapka makmal ke ngaga pansik sentang penyakit nya.
“JKS maya nya ngeripot 6 iti kes penyakit rabies baka ti ditetapka makmal nya, ke alai lima iku udah parai.
“Kes ke pemadu baru dipadah nyadi kena 8 Ogos 2017, ke alai orang ke kena penyakit nya benung raya sakit diatu,sereta dipasuk ngagai ICU ba Sepital Besai Sarawak (HUS),” ku iya.
Dr. Sim ti mega ADUN Batu Kawa madah, naka 25 Oktober taun tu, empat bagi menua kena penusah rabies, iya nya Serian, Kuching, Sri Aman enggau Samarahan.
“Urung 4,320 kes kena gigit jelu ba kanang endur ke bisi rabies udah diripot ngagai JKS. Ari penyam- pau nya 1,586 kes udah dituchuk ngena Vaksin.
“Opis Menteri kami seruran bekerejasama enggau JKS, Opis Servis Veteriner (DVSS), ejensi opis perintah, enggau NGO ba pengawa nagang penyakit rabies tu ari ngerampit ngagai endur bukai,” ku iya.
Aku iya baru,penyakit Rabies tau ngasuh orang parai enti enda dianjung berubat.
“Taja pia, urung 100 kes ulih ditagang nengah chara diperubat enggau jampat enti bisi kena gigit ukui gila.
“Sarawak tau dipadah nadai agi rabies enti dalam timpuh dua taun ari diatu nadai agi kes rabies nya nyadi,” ku iya.