Perintah numbuhka Program Nyukat Tanah Inisiatif Baru ungkup tanah NCR
KUCHING: Perintah seruran deka ngelengkaska pengawa nyukat tanah Adat Bansa Asal (NCR) nengah chara nyukat kelingi (perimeter) kandang menua nya nengah Program Nyukat Tanah Inisiatif Baru.
Sapit Kepala Menteri Datuk Amar Awang Tengah Ali Hasan madah program tu udah digaga kenyau ari bulan Oktober 2010 lalu digaga dalam dua renggat, iya nya renggat keterubah, nyukat perimeter lalu renggat kedua, nyukat kandang endur orang ke ngatika diri.
“Dalam renggat keterubah, nyukat nitihka perimeter digaga kena ngelai sitak nya nyadi Rizab Komunal (kena betanam betupi) Bumiputera nengah Seksyen 6 Kanun Tanah Nengeri.
“Naka bulan Oktober 2017, urung 804,826 hektar (1,988,725 ekar) udah mujur disukat perimeter, lalu ari penyampau nya, urung 643,017 hektar (1,588,895 ekar) di serata menua Sarawak udah dikelai,” ku Awang Tengah.
Iya madah munyi nya lebuh nyimpul jurai jaku iya bekait enggau Opis Menteri Pemansang Mengeri enggau Rampa Menua di Aum Kedua ke Penggal Kedua, Aum Kunsil Nengeri Sarawak ke-18 di Komplek DUN ditu, kemari.
Awang Tengah ti mega nyadi Menteri Kedua Pemansang Mengeri enggau Rampa Menua,nandu baru madahka ba renggat kedua program tu ila, sitak baruh seksyen 6 deka disukat kediri.
Naka kediatu, ku iya, urung 15,351 kandang endur orang ke ngatika diri udah mujur disukat ke mungkur urung 17,776 hektar (43,925 ekar).
“Perintah seruran ngelala sereta bebasaka hak rayat ba tanah sida iya. Urung 6,024 kandang endur dalam pemesai 5,261 hektar (13,000 ekar) udah diberi surat pala tanah nengah Seksyen 18 Kanun Tanah Menua.
“Nya alai, aku ngelalau bala Yang Berhormat sereta semua sida ke kelim tanah NCR, ngambika meri kerejasama penuh ngagai Opis Tanah & Survei (JTS) ngambika kereja nyukat nya ulih bejalai enggau manah kelebih agi ke bisi bekait enggau tanah kandang endur orang ke ngatika diri,” ku iya.
Ba saut iya ngagai tanya Kaban Kunsil Nengeri (ADUN) Daro, Safiee Ahmad bekait enggau sitak Sungai Lengan, Sibu ke dipinta ulih Dee anak Tam, TR Bayang anak Dollah, TR Liang anak Gundi, TR Kaming anak Tugang, TR Jingga anak Kedit, TR Jimmy anak Saing, TR Bungkok anak Itam, TR Egat anak Kudang, TR Lanting anak Jambol, TR Seli anak Jambol, udah tembu di sukat perimeter nengah Program Nyukat Tanah NCR Inisiatif Baru kena 30 September 2014 ke mungkur pemesai tanah dalam 466 hektar.
“Taja pia, kelai sitak nya bedau ulih digaga laban sitak nya agi benung dalam kes kort ke bekait enggau TR Abell anak Mang sereta dua iku orang bukan ngelaban Delta Padi Sdn Bhd sereta dua iku orang bukai, alai diatu kes nya udah ditarit pulai baru ulih Plaintiff empu bedau lama tu tadi.
“Randau deka digaga baru kena netaka garis sitak ke udah disukat sebedau proses kelai sitak nya ulih disanbung baru,” ku iya.
Awang Tengah ti mega nyadi Menteri Industri enggau Pemansang Orang Dagang, kelimpah ari nya madahka pengawa nyukat ke dipinta ulih TR Francis Kiai anak Pengarah sereta sida bukai, ke sitak Sungai Blusan enggau Sungai Sah, Nanga Singat, Batang Rajang, Sibu enda ulih disambung laban dibantah ulih komuniti dia.
Ba pekara nya mega, peminta nyukat sitak Sungai Passin, Matu diatu agi benung diperesa JTS sebedau iya diperundingka baru.
“Nitihka rikod JTS, bedau bisi peminta diterima ke tiga buah sitak, iya nya Nanga Lassa di Sibu, Nanga Semah sereta Sungai Serban di Daro.
“Nya alai, sida ke kelim tanah dilalau nganjung peminta sida iya ngagai Opis Pelilih Menua, JTS di sitak nya empu,” ku iya.
Bekait enggau peminta ulih ADUN Daro ngambika komuniti sereta rumah panjai di sitak Singat, Mawan, Stubah enggau Sg Lengan ngena jalai kebun nyadi sebagi ari Tanggung Pengawa Rama Korporat (CSR), seiak Lembaga Pembangunan dan Lindungan Tanah (PELITA) deka nyerahka pekara nya ngagai opis ke bejalaika kompeni kebun sawit nya, ngambika sida iya ulih ngaga jalai nya, ku iya.
Ba tanya ADUN Opar, Ranum Mina ngagai menteri tu bekait enggau Program Nyukat Tanah NCR Inisiatif Baru, urung 20 sitak di dalam DUN Opar dalam pemesai 22,398 hektar udah disukat perimeter nengah Renggat Keterubah program tu, nyengkaum sitak Kampung Temaga Dayak.
“Ari penyampau nya, 16 sitak dalam emesai 20,731 hektar udah dikelai nyadi Rizab Komunal Bumiputera (kena pengawa betanam betupi) nengah Seksyen 6, Kanun Tanah Nengeri (KTN).
“Nengah Renggat Kedua program tu, tujuh sitak nya udah dikemendarka disukat kandang endur sida ke ngatika diri lalu naka kediatu, urung 305 kandang endur udah disukat nyadi kandang endur ngatika diri lalu udah diberi pala tanah nengah Seksyen 18 KTN,” ku iya.
Ba lansa bukai, iya madah nengah Program Nyukat Kampung Tradisional, naka kediatu pengawa nyukat nya ke Kampung Jugan udah tembu digaga lalu pala tanah Seksyen 18 KTN ke genturung pendiau nya deka diberi taun baru tu ila.
“Opis JTS bisi udah nerima urung 19 peminta bukai ke benung diperesa sebedau iya dianjung minta diperunding sereta dikemendarka,” ku iya.