Bengkel Jari Emas mujur ngerapitka kaul raban bansa Kenyah, Penan di Ulu Baram

MIRI: Biro Indu Gerempung Bansa Kenyah Sarawak (PKKS) apin lama ke udah bisi ngatur bengkel Jari Emas pengelama dua hari lalu berandau ka Chara Nagang Penyalah ba Kampung Lio Mato di Ulu Baram.

Program keterubah iya diatu nya bisi digulu 17 buah kampung, tebal agi rumah panjai bansa Penan, kelimpah bansa Kenyah ba ulu Baram.

Entara genturung pendiau ke bisi ngambi bagi iya nya Long Tungan, Long Semiang, Long Selaan, Long Moh, Long Sebatu, Ba ‘Muboi, Long Lamam, Ba’ Ajeng, Long Balong, Long Murung, Data Bila, Long Lamai, Long Sepigen, Long Beruang enggau Lio Mato.

Ketuai Biro Indu PKKS, ke mega chairperson program, Annia Selalang Lawai madah lebih ari 200 iku nyengkaum indu, lelaki enggau bala anak sida ngulu bengkel nya.

Tuju tu dikena ngelakuka penyerakup rayat ba sitak nya, kelimpah ngerapitka kaul entara bansa Kenyah enggau Penan ba Ulu Baram.

Kelimpah nya, iya betuju ngetanka pengerindu ba pengawa ngaga kraf jari.

“Iya mega nyadi pelasar ngagai kami ngetanka main asal ba raban anak mit ditu sereta ngajar sida chara nyungkak ekonomi ngambika lebih kreatif enggau inovatif,” ku Annia.

Iya madah munyi nya ba hari keterubah bengkal lalu sida bisi ngajar bala peserta chara ngaga kraf antin enggau marik ngena manik.

“Manik endang sebagi ari main asal enggau adat Orang Ulu lalu kami ngajar enggau naka ulih chara ngaga ke pemadu manah enggau ngenegapka pengelandik komuniti ditu,” ku iya madah ngagai tusan Borneo ditu.

Udah nya ba hari kedua bengkel nya, iya madah bala pesereta diajar ngaga pengelandik enggau beranyam ngena rotan enggau raga.

“Terubah iya, kami melabaka enda ngelui ari 70 iku orang ngulu bengkel tu, tang kami berasai gaga meda penatai sida ngelui ari disadang kami, iya nya lebih 200 iku lalu semua sida berasai gaga deka belajar beranyam ngaga raga rotan enggau ngagai perengka ari manik,” ku iya.

Dikena ngemujurka bengkel nya, PKKS bisi ngangauka dua iku orang profesional ba dua bengkah pekara iya nya Rose Awing enggau Unjong Bilong meri licha pasal ngaga dua bengkah kraf nya.

Kelimpah nya, bisi randau diatur bekaul enggau chara nagang penyalah dikena ngiri penemu ngagai peranak menua pesisir lebih agi bekaul enggau dadah.

“Kami ba PKKS, lebih agi Biro Indu ngasaika beguna amt kami ngajar sida ke biak bekaul enggau pangka negatif dadah.

“Kami ngarap nengah licha baka tu, kita ulih mandangka penerang ngagai mensia mayuh iya nya dadah munsuh kitai lalu nadai endur ungkup pengawa ke enda menuku baka nya,” ku iya.

KE PENGINGAT: Annia (baris tiga, duduk tengah) enggau bala pesereta begambar nyadika kenang begulai enggau asil anyam, sekumbang bengkel nya.

TEPA: Annia (tengah) nyuaka tepa ngagai siku pemesai ari Balai Polis Marudi, ti ngarika Ketuai Polis Pelilih (KPD) Marudi, DSP Gabriel Risut pengudah meri licha pasal Nagang Penyalah ba Lio Mato.

MERANSANG: Annia (tengah) meri peransang ngagai bala peserta.

LANDIK: Siku indu orang Ulu mandangka pengelandik nganyam raga rotan.

NGUJI: Siku indu bansa Penan benung nguji ngaga marik ari manik.