Penyampau temuai datai ke Sarawak bisi nambah
KUCHING: Dalam timpuh sembilan bulan keterubah taun tu, Sarawak nerima 3.72 juta iku temuai ti lalu ngayanka penambah 9.81 peratus dibandingka enggau timpuh ke sama taun 2016, ti bisi 3.3 juta iku temuai.
Menteri Dagang Temuai, Seni, Main Asal, Nembiak Lumba enggau Main, Datuk Abdul Karim Rahman Hamzah madah, penyampau temuai dalam timpuh sembilan bulan nya udah ngasilka RM6.9 bilion.
“Bepelasarka trend puku rata ari bulan Oktober ngagai Disember sebedau tu, opis menteri aku melabaka urung 5 juta iku temuai datai ke sarawak dalam taun 2017 iya nya nambah 7.3 peratus dibandingka enggau 4.66 juta dalam taun 2016.
“Sektor dagang temuai Sarawak dipelabaka ngasilka penatai pemisi RM8.98 billion (nambah 6.9 peratus), ti lalu meri urung 8.2 peratus ngagai GDP nengeri dalam taun 2017.
“Ba taun 2018, juluk opis menteri aku deka nerima urung 5.25 juta iku temuai enggau asil belanja diterima urung RM9.82 bilion,” ku iya.
Karim mansutka pekara nya lebuh ti nyimpul jurai Opis Menteri Dagang Temuai, Seni, Main Asal, Nembiak & Lumba enggau Main ba Hari keenam, Aum Kedua Penggal Kedua Kunsil Nengeri Sarawak Ke-18 ba Kompleks DUN,ensanus.
Nitih ku iya, penyampau temuai nya berindika ari ti mayuh pematak dagang temuai ke dipejalaika dalam taun tu baka Rainsforest World Music Festival ( RWMF), Sarawak International Dragon Boat and Regatta, 73 Bussines Events enggau ke bukai.
RWMF taun tu nerima penatai 19,382 iku dibandingka enggau 18,300 iku taun nyin kemari. Lalu ari penyampau nya 30 peratus ukai peranak Malaysia. Penyampau tiket ke ulih dijual mega nambah 30 peratus ari taun nyin kemari, RM959,885.00, ku iya.
Kelimpah ari nya Karim meransang mensia mayuh di menua pesisir ngambika terus chakah nyereta industri dagang temuai nengah ‘Community Based Ecptourism’ ( CBET) ( Dagang Temuai Bepelasarka Komuniti) ti mekuh ngagai aktiviti raban bansa bekaul enggau nyaga rampa menua enggau pengeraja asal, ngemeranka main asal menua tu lalu berebak enggau tu nyendiaka peluang gawa enggau penatai pemisi.
Ku iya, ba taun 2017 bisi enam buah homestay baru direjista iya nya Homestay Rh Penghulu Philip Kayak, Sungai Durin Sibu; Homestay Lobang Baru di Serian; Homestay Singai di Bau; Homestay Mulu di Miri; Homestay Long Banga di Ulu Baram, Miri enggau Rumah Margherita di Julau.
“Diatu bisi 41 homestay direjista enggau bisi 528 operator tauka pengemeran homestay di serata Sarawak.
“Opis menteri mega bisi ngatur program pembinaan keupayaan ungkup operator homestay enggau raban bansa nengah kus baka Bengkel Pembangunan Produk Pelancongan enggau Kursusu Asas Perakaunan dan Keusahawanan enggau Bengkel Kebudayaan dan Kesenian.
“Objektif kus tu dikena nambahka penemu enggau kualiti servis operator homestay ngambika ulih nyendiaka servis engkeman ngagai temuai ke lalu ulih nyungkakka penatai pemisi homestay sida,” ku iya.
Opis Menteri bekerejasama enggau raban bansa menua tu nengah Program Kesedaran Pelancongan dikena ngangkatka penyedar bekaul enggau industri dagang temuai.
Ku iya program nya deka nenrangka bekaul enggau penguntung sektor tu ke ulih nyungkakka tikas penatai pemis sereta ke bukai. KUCHING: Ubah ba Kod Tanah Sarawak sentang Pemakai Menua enggau Pulau Galau disadang dibantai ba Aum DUN bulan Mei 2018.
Berindik enggau nya Sapit Kepala Menteri Datuk Amar Douglas Uggah minta semua nganti dulu maya nya.
“Perintah Nengeri disadang mantaika ubah sentang Pemakai Menua enggau Pulau Galau ba Aum DUN bulan Mei taun 2018,” ku iya seraya madah pansik sentang ubah nya dipejalai chara holistik.
Uggah mansutka jaku nya lebuh nyimpul jurai Aum Dun Ke-18, Penggal Kedua ke diatur di Komplek DUN ditu, kemari.
Ngenang kaul ke sama, iya madah pemansang tanah bansa asal seruran nyadi agenda besai ba pemansang pengawa betanam betupi enggau menua pesisir di Sarawak.
Perintah Nengeri disadang mantaika ubah sentang Pemakai Menua enggau Pulau Galau ba Aum DUN bulan Mei taun 2018. Datuk Amar Douglas Uggah Sapit Kepala Menteri Sarawak
Meretika pemesai guna pekara nya, Uggah madah ubah ba sentang model ‘joint venture’ serta nyendia model bukai ngambika tau dipilih orang bempu tanah dikemerat.
“Naka ke diatu, penyampau tanah NCR ke udah dikemendar disukat 1.2 juta hektar ke alai 808,826 hektar udah disukat kelingi.
“Ari penyampau nya, 643,017 hektar udah digazet nyadi tanah rizab bansa asal nengah Seksyen 6 Kod Tanah Sarawak,” ku iya.
Iya nambah, ari penyampau ke digazet nengah Seksyen 6, 17,776 hektar udah diberi pala tanah nengah Seksyen 18 Kod Tanah Sarawak ti mungkur 15,351 lot.
Uggah ke mega Menteri Betanam Betupi Moden, Tanah Adat enggau Pemansang kandang Menua nambah model ‘leasing’ deka dibantaika ba kabinet.
“Bepelasarka peneleba ngemujur model JV nengah konsep pemansang tanah NCR ke dipun ba taun 1995 sereta dikemanah ba 2015, kitai meseti ngemanah model ke diatu kelimpah nyendia model bukai ngambi tau dipilih orang bempu tanah,” ku Uggah.