Tiga jalai penerebai MASWings diketu, disilih enggau palan bukai

KUCHING: Sarawak deka ngiga palan bukai dikena nganti penerebai MASWings ti ngetuka tiga jalai penerebai di menua pesisir nengeri tu.

Sapit Kepala Menteri ti mega Menteri Pemansang Infrastruktur enggau Perengka Pengangkut, Tan Sri Datuk Amar James Jemut Masing meri penemu naka ke diatu Hornbill Skyways Sdn Bhd nganti MASWings.

“Taun baru MASWings ngetuka tiga jalai penerebai di nengeri tu. Kitai enda ulih nejuka kandang menua pesisir nya nadai bilun nyadika penyambung enggau endur bukai.

“Nya alai kitai patut ngiga jalai penerebai bukai dikena nyilih jalai nya. Kitai ngasaika penerebai AirAsia ti pemadu manah tang sida baka ti nadai ati, tambah mega sida terebai ngagai enda ngira endur diatu.

“Aku meri penemu kitai patut bisi penerebaika kediri empu. Ba penemu aku, awakka Hornbill Skyway nyilih sida ba jalai ke diketuka ( MASWings),” ku iya lebuh dikerandau raban pengarang berita ba Kompleks Kunsil Nengeri (DUN) ditu, kemari.

Bejaku baru iya madahka penerebai MASWings sebedau tu bisi nerima subsidi ke disediaka perintah lalu pekara ke sama mega deka diberi ngagai penerebai ke nganti ila.

“Barang bagi kompeni pe- nerebai ke ngambi jalai nya ila, tetap diberi subsidi baka ke diberi ngagai MASWings diatu,” ku iya.

Masing mansutka penerang lebuh ditanya bekaul enggau MASWings ti deka ngetuka penerebai ba tiga jalai penerebai di Sarawak nyengkaum tiga di Sabah.

Bulan Oktober tu tadi, MASWings diripot deka ngetuka operasyen ba enam palan di Sabah enggau Sarawak taun baru dikena meri peluang ngagai sistem penerebai komersial.

Jalai ke diketuka MASWings iya nya Kota Kinabalu- Sandakan; Kota Kinabalu- Tawau, Kota Kinabalu- Miri, Kuching- Miri, Kuching- Kota Kinabalu enggau Kuching-Sibu.