RM223 juta udah diagih dikena ngemansang sektor betanam betupi
KUCHING: Perintah nengeri udah ngagihka belanja sepenyampau RM223 juta dikena ngemansangka sektor betanam betupi nengeri tu, ungkup taun 2018.
Sapit Kepala Menteri ti mega Menteri Betanam Betupi Moden,Tanah Adat enggau Pemansang Kandang Menua, Datuk Amar Douglas Uggah Embas madah, ungkup belanja nya penambah ngagai penyampau belanja ari perintah besai ti deka dikerandau sereta diperundingka enggau opis menteri ke bekaul.
Ungkup belanja ke dikemendar sereta diagih nya deka dikena mantu ngang- katka tikas pengidup orang bumai bekebun, betupi enggau orang berikan di nengeri tu, ku iya.
Aku beterima kasih ngagai YAB kepala menteri laban ke ulih meretika enggau nyukung ngena chara ngungkupka belanja ngagai opis menteri terus bejalaika pansang enggau transformasyen dalam sektor betanam betupi ba taun 2018.
Kami arap bendar pejalai enggau penembu projek sereta program deka mantu memodenkan enggau mengkomersialkan sektor betanam betupi nengeri.
Uggah mansutka penerang nya lebuh ti nyimpul jurai Opis Menteri Betanam Betupi Moden, Tanah Adat enggau Pemansang Kandang Menua ba Aum Kedua Penggal Kedua, Aum Kunsil Nengeri Sarawak Ke-18 ba hari ke penudi baum ti diatur ba Komplek DUN ditu, kemari.
Bejaku baru iya madahak perintah komited bejalaika intervensyen tumu bepelasarka perambu komiti kabinet pasal transformasyen sosio-ekonomi ke bisi enam Bidang Pengasil Besai dikena ngelengkaska penumbuh ekonomi lalu nyapai juluk transformasyen sosioekonomi.
Uggah enggau gaga ati madahka program enggau projek ari baruh 6 KRA bejalai enggau lanchar, ke alai diatu opis menteri deka mekuh ngagai pemansang KRA 2, iya nya ngemoden enggau mali sektor betanam betupi ngagai pengawa dagang ke lalu ngangkatka semua semua bekal enggau rega industri betanam betupi di nengeri tu seraya nyungkak penatai pemisi orang betanam betupi ke dijaga opis menteri aku lalu 5 KRA ke bukai udah diripot piak ke bekaul.
“Perintah nengeri udah ngemendarka agih belanja sepenyampau RM80.0 juta dikena bejalaika sekeda pro- gram enggau projek dibaruh KRA 2 ngemoden enggau mali sektor betanam betupi ngagai pengawa dagang ari baruh komiti kabinet dalam transformasyen sosioekonomi.
“Bisi 5 program enggau projek besai dikemansangka nengah servis veterinar opis betanam betupi ngena SET.
“Lima program enggau projek besai nya baka palan pemansang crop, ngumpul, proses enggau mungkus (CPPC), Fatm Infrastructure, Cattle Intwgration with Oil Palm Plantations and Edible Bird’s Nest.
“Sepenyampau RM20.0 juta udah dikemendarka dikena bejalaika 204 projek infrastruktur kebun ti nguntungka 3,900 iku pekebun. Naka ke diatu, bisi 49 projek udah tembu lalu 155 projek agi dalam proses sereta dipelabaka tembu ujung taun tu,” ku iya.
Nambahka nya iya madah entara komponen program transformasyen betanam betupi nengeri iya nya deka ngemeranka teknologi digital dalam sektor betanam betupi, senipak enggau agenda ekonomi digital nengeri.
Ku iya, perintah nengeri udah ngemendarka ungkup belanja sepenyampau RM2.25 juta dalam taun 2018 dikena bejalaika 8 projek baka ngemanahka agi laman web Opis Betanam Betupi, nyikap CPPC Tarat, Serian ngena Internet of Things (IoT) enggau ke bukai.
Kelimpah ari nya komponen program transformasyen iya nya ngenegapka chara nyual produk betanam betupi ngena ‘Sistem Pemasaran Pertanian Bersepadu’ ke ulih nyendiaka rintai ari kebun ngagai pasar asil produk betanam betupi nengah kordinasyen sistematik ke dipejalaika pasar malam opis kunsil menua, Pasar Tani enggau Agro Bazaar FAMA, palan ngumpul FAMA enggau ke bukai.