Penemu ke dibantaika bala pengari rayat Barisan Nasional bisi pematut sereta bepelasarka pekara ti amat, ku Abang Johari
KUCHING: Penyulut dipandangka pengari rayat Barisan Nasional (BN) ba Aum Kedua Penggal Kedua Kunsil Nengeri (DUN) ke18 dipeda lebih manah tauka nyulut agi dibandingka enggau raban penyakal, nerima puji ari Kepala Menteri Datuk Patinggi Abang Johari Tun Openg.
Iya madahka penemu ke dibantaika pengari rayat BN sigi bisi pematut sereta rega ti ngemujurka betapi enggau raban penyakal.
“Pekara ke deka dipadahka aku ditu, ke sekali tu (Aum DUN Ke- 18) aku meda penyulut dipandangka kitai lebih manah agi ari sida (penyakal), lalu aku arap bendar jemah ila kitai deka selalu lebih manah ari sida.
“Penyakal ulih bejaku enda ngira nama utai ke deka dikejaku, laban kitai bisi rega, kitai bisi pematut entara kitai dalam BN lalu lebuh maya kitai madah tauka mantaika sesebengkah pekara kitai bepelasarka utai ke amat.
“Ari sukut intelektual aku ngasaika kitai lebih manah ari penyakal, nya alai aku meri puji ngagai BNBBC (Kelab Penyukung Barisan Nasional),” ku iya.
Abang Johari muji raban pengari rayat BN nya lebuh pengerami makai serumpu Kelab Penyokong Barisan Nasional (BNBBC) Sarawak ke diatur kelab nya ba sebengkah hotel ditu, malam ensanus.
Bejaku baru iya melabaka raban penyakal enda tentu meretika polisi ke dipejalaika perintah BN baka pasal ekonomi digital enggau Bank Pemansang Sarawak (DBOS) bepelasarka chara sida nya mantaika penemu maya baum DUN tu tadi.
“Kebendar iya sida (penyakal) tekenyit lebuh kitai madahka kitai meri bonus sebulan batang gaji tauka minimum RM2,000 ti diberi bulan Disember tu ngagai pengereja pengawa opis perintah nengeri. Kitai ngungkupka RM45 juta ke tuju tu.
“Kitai meri tu dikena kitai ngaku sereta beterima kasih ngagai pemendar sida ke gawa, tambah mega maya ujung taun mayuh utai dibayar sida baka mayar anak sekula,” ku iya.
Berebak enggau tu Abang Johari mega meransang sereta ngelalau pengari rayat BN ngambika terus gawa sereta bejalaika polisi ke udah ditumbuhka.
Enggau sukung ari semua pengari rayat BN, iya arap bendar polisi ke ditumbuhka iya sepemanjai ke nyadi kepala menteri ulih mujur dipejalaika.
Ambika banding bekaul enggau Sarawak Pay ke baru udah dipenyadi, Abang Johari arap bendar peranak di menua pesisir jemah ila deka ulih bebayarka bil nengah Sarawak Pay enti infratruktur tauka peneras internet menua pesisir udah dikemanahka.
“Nama ke patut digaga kitai diatu, kitai terus gawa kitai udah bisi polisi semina Big Data aja kitai bedau tembu semua, kitai deka tembu semua Big Data kitai dalam bulan April (taun baru).
“Udah tu kitai gawa aja ngenataika nama ke udah disemaya. Aku ulih netap tauka besemaya enggau kita iya nya aku ulih ngamatka utai ke udah disebut aku dalam tiga tauka empat bulan tu.
“Sebedau pengawa bepilih semua utai nya tembu laban kita bisi chara kediri,” ku iya.
Sama bisi datai bini iya, Datin Patinggi Datuk Juma’ani Tuankku Bujang Sapit; Kepala Menteri Datuk Amar Douglas Uggah Embas, Chaiman BNBBC Paulus Palu Gumbang sereta bala kaban BNBBC enggau ke bukai.
Pekara ke deka dipadahka aku ditu, ke sekali tu (Aum DUN Ke-18) aku meda penyulut dipandangka kitai lebih manah agi ari sida (penyakal), lalu aku arap bendar jemah ila kitai deka selalu lebih manah ari sida. Datuk Patinggi Abang Johari Tun Openg Kepala Menteri Sarawak