PETRONAS enggau PCB mujur nyain sempekat kerejasama dagang bitumen
KUCHING: PETRONAS Dagangan Berhad kemari, nyain sempekat kerejasama enggau PUSTAKA Capital Sdn Bhd ( PCB) bejalaika industri dagang bitumen di nengeri Sarawak.
Pengerami nyain sempekat dua ejensi nya dikemataka Sapit Kepala Menteri Datuk Amar Awang Tengah Ali Hasan ti mega Menteri Industri enggau Pemansang Orang Dagang.
Nengah sempekat nya ku iya, nya deka muka peluang PCB terus ngambi bagi dalam dagang bitumen nengah pengawa dagang enggau ngudar bitumen ke serata nengeri tu.
“Tu lalu ngayanka penegap tauka pengarap PETRONAS ngagai kompeni menua tu bejalaika dagang bitumen di Sarawak. Nya alai, perintah nengeri ngarapka ulih meda mayuh agi penyereta dalam dagang PETRONAS di Sarawak,” ku iya.
Nambahka nya Awang Tengah madahka, enti udah tembu perengka endur nyimpan bitumen di Tanjung Manis, dikearapka nadai penanggul suntuk bekal bitumen di Sarawak dikena napi peminta projek ngaga jalai alun nyengkaum pengawa ngaga Jalai Besai Pan Borneo, jalai tebing tasik, jalai alun kedua enggau jalai menua pesisir.
Iya madahka pekara nya lebuh bejaku ba pengerami nyain sempekat nya ke diatur ba sebengkah hotel ditu, kemari.
Maya nyain sempekat kerejasama nya, PETRONAS Dagangan Berhad diarika Direktor Pengatur Pengawa enggau Ketuai Pemesai Eksekutif Dato Ibrahimnuddin Mohd Yunus lalu PCB diarika Chairman iya, Datu Sarudu Hoklai.
Awang Tengah madahka bisi peminta tinggi bitumen ba nengeri tu laban semina 56.11 peratus ari sambung jalai 33,513 kilometer (KM) ke udah bisi di Sarawak ke udah dibelakin.
“Nya alai perintah benung bebendar nyambungka jalai alun di serata nengeri tu lebih agi di menua pesisir nengah program transformasyen menua pesisir,” ku iya.
Menteri Pemansang Mengeri enggau Pengeraja Asal Kedua nya madahka, ketegal palan ti strategik, Tanjung Manis nyendiaka peluang dagang ti besai ngagai pemeranak puku enggau komuniti dagang.
Naka ke diatu ku iya, perintah udah meranakka sepenyampau RM3.14 billion dikena nyikap ingrastruktur di Tanjung Manis ti ukai semina ke guna komuniti dagang tang mega nyangkeaum raban bansa ba menua nya.
“Sehari tu, Tanjung Manis ulih dilawa ngena jalai alun, langit enggau tasik. Perengka guna mensia mayuh baka bekal ai, elektrik enggau telekomunikasi pan bisi disediaka,” ku iya.
Awang Tengah madahka, naka ke diatu, PCB benung ngaga lebih 200 unit rumah endur diau dikena nampung peminta guna peranak di Tanjung Manis ke majak nambah.
“Nengah inisiatif tu, aku arap bendar Tanjung Manis besedia maju tauka ngerembai nyadi hab ekonomi baru enggau pemansang industi ti mayuh macham baka industri Halal Hab, industri ngaga kapal, Kluster Perindustrian Kelapa Sawit (POIC), industri bepelasarka kayu, industri berikan enggau industri bukai,” ku iya.
Sama bisi datai, Mandal Presiden Pengawa Makit PETRONAS, Dato’ Syed Zainal Abidin Syed Mohd Tahir.