Nadai kebuah laki nagang bini ke begaji besai badu gawa, ku Salang
PAKAN: Jemah ila dipelaba sida ke lelaki semina diau di rumah tang bini gawa ngiga belanja.
Kaban Parlimen Julau Datuk Joseph Salang madah, pekara baka nya tau nyadi enti gaji sida ke indu lebih besai enti dibanding enggau sida ke lelaki.
“Diatu mega kitai ulih meda mayuh agi nembiak indu nampung pelajar ba universiti.
“Dipelabaka ari 10 iku enam iku ari sida orang indu,” pia ku iya maya bejadi Pengerami Ngintu Hari Orang Indu Renggat Pelilih Pakan ba Balai Mensia Mayuh Pakan, kemari.
Ku Salang, enti bisi besai agi gaji ari laki, nadai kebuah laki nagang sida gawa. “Tang dua-dua piak meseti berandau dulu sebedau pekara baka nya nyadi,” ku iya madah baru. Iya madah, pekara tu udah bisi nyadi ba menua bukai ke udah mansang tang baka ke nyelai dikereja ba menua tu.
“Nya alai, kitai meseti besedia nyangka pekara baka tu tau nyadi.
“Sida ke laki enda patut meda pekara tu ngeruga runding nyentuk mambarka ruang bilik,” ku iya madah.
Berebak enggau pengerami nya, Salang bela ngelalau sida ke indu ba menua pesisir ngambika enda sanggu ngereja pengawa dagang, kelimpah betanam betupi.
“Enti kita mayuh bulih penguntung tu deka mai pemaik sereta ngangkatka tikas pengidup ruang bilik lalu likun ari penusah suntuk belanja,” pia ku iya madah.
Ba pengerami nya, iya bela bisi ngereahka geran sepenyampau RM20,000 dikena nyaup komiti pengatur ngaduka mayuh agi program ti mai penguntung ngagai raban indu di pelilih Pakan.
Nangkan ke nya, Salang bisi nyuaka setipikit ngagai komiti pengatur ti betuaika Hellen Mawar.
Helen ba jaku iya dulu agi ari nya nangkan sida ke indu ngambika enda ati dua nyukung tegut Salang iya ke udah dikeandalka baru bediri ba Parlimen Julau maya Pengawa Bepilih Besai ti deka datai.
“Iya udah ditemu kitai nyadi siku pengari rayat ti mentas sereta udah mayuh amat nyaup raban indu ba Parlimen Julau,” ku iya madah.