Dalam komponen Barisan Nasional kitai endang patut chakah agi begulai ngatur pengawa, ku Nanta
KAPIT: Sapit Menteri Pemansang Menua Pesisir Enggau Kandang Menua, Datuk Alexander Nanta Linggi ke lalu nyadi Kaban Parlimen (MP) Kapit, meri jaku lalau ngagai parti komponen Barisan Nasional (BN) ngambika regas, chakah gawa sereta ransing gawaka rayat.
“Parti Komponen BN endang patut regas. Aku lantang endar meda Parti Sa’ati Rakyat Sarawak ( SUPP) Pampang Kapit udah mujur milih kaban komiti baru sida ungkup penggal 2018-2020.
“Aku berasai lantang meda komiti baru datai ari rebak baru seraya ngetanka orang lama nyadi penyanding penemu. Rebak baru diberi tanggungpengawa besai seraya sida ke tuai ke bisi peneleba terus ngiring sereta bekunsika penemu.
“Aku endang nganti gawa rat begulai enggau SUPP Pampang Kapit,” ku Nanta lebuh nerima penemuai meri basa ari komiti baru SUPP Pampang Kapit, diketuaika chairman sida, Ling Thiam Ing diatur ba Restauran Ak Kau, ditu, lemai Hari Lima tu tadi.
“Baka ti diperatika aku ngelama tu, aku meri terima kasih ngagai semua kita ti udah nyaup aku. Aku beratika semua kita mega chakah ngaul diri dalam serakup enggau kelab di pasar tu.
“Manah endar diatu kita udah begempung gawa begulai ungkup parti, SUPP komponen BN. Kita udah seruran meri mayuh perambu ungkup rayat. Aku endang ngenang pemanah
Aku berasai lantang meda komiti baru datai ari rebak baru seraya ngetanka orang lama nyadi penyanding penemu. Rebak baru diberi tanggungpengawa besai seraya sida ke tuai ke bisi peneleba terus ngiring sereta bekunsika penemu. Datuk Alexander Nanta Linggi Sapit Menteri Pemansang Menua Pesisir Enggau Kandang Menua
kerejasama rat.
“Nya pengari rayat, kita (SUPP) seruran tau berandau enggau aku tauka minta bantu aku di palan servis. Kita mega ulih betelefon nuju aku,” ku Nanta.
Ku iya, nyadi komponen BN, kitai endang patut chakah agi gawa begulai.
“Kami ari PBB baka aku empu, MP Kapit, Kaban Kunsil Nengeri ( ADUN) Bukit Goram, Jefferson Jamit Unyat. PBB enda ulih gawa kediri. Nya kebuah aku dekaka kita chakah ngaul diri.
“Enti sema kita bisi aktiviti baka pengawa rama, pelajar, ngintu pengelantang enggau ke bukai, lalu kita begunaka bantu, aku deka mantu kita,” ku Nanta nerang.
Nangkan nya ku iya, politik tu dinamik, dalam politik kita patut nyingkang laban iya seruran berubah. Chakah gawa nengah pejalai politik. Nyadi sebagi ari perintah, kitai ulih ngemai isu enggau timbal ari raban di menua ngagai perati piak bekuasa bekaul ngambika gawa. Kitai meseti bisi penyiru ngagai rayat.
Pia mega, udah nyadi pangku pengawa iya ngintu pengelantang semua, iya enggau Jamit patut nangkup peminta semua komuniti China, serakup peturun, sekula enggau genturung pendiau.
Iya ngenang pasal belanja penyampau RM500,000 ungkup SJK © Hock Lam, Tadika Chung Hua, RM500,000 Balai Mayuh Guna Komuniti Foochow, RM500,000 Balai Mayuh Guna Kampung Cina Bletih, RM40,000 Serakup Kwang Tung Kapit, RM1,000 sepintu mayar TOL tanah premium ngagai 56 ruang bilik China dipindah ngagai Kampung Cina Bletih sereta ke bukai.
Chairman ke baru dipilih, Ling Thiam Ing rambau penemuai meri basa nerangka lis nama bala komiti baru sida sereta perambu aktiviti pampang nya berengkah ari November 2017 nyentuk November 2018 seraya minta lalau ari Nanta.
Ngarika SUPP Kapit, Ling Thiam Ing mega nandu sukung tegap ngagai bala ketuai BN – Menteri Besai enggau Kepala Menteri. Sida sedia bekerejasama enggau gawa rat begulai enggau bala pengari rayat di Kapit, nyengkaum Sapit Kepala Menteri Sarawak, Tan Sri datuk Amar Dr James Jemut Masing (N64 Baleh), Nanta (P215 Kapit), Datuk Wilson Ugak Kumbong (P216 Hulu Rajang), Wilson Nyabong Ijang (N61 Pelagus) enggau Jefferson Jamit Unyat (N63 Bukit Goram).
“Rambau aum komiti kami keterubah diatur kena 14 November tu tadi, kami endang ngemeratka kerejasama enggau gawa rat begulai enggau Raban Pengawa Bepilih BN dikena napi Pengawa Bepilih Besai Ke-14 (PRU14) ti deka datai.
“Kami deka nyikap bala kaban kitai ngambi ngelalau kaban belayan sereta bakih sida nama kebuah patut ngundi chalun BN (penyandang, Nanta, getanka penuduk iya, P215 Kapit).
“Tagit kami pengundi di mengeri ngundi Nanta nentuka iya menang enggau majoriti besai. Pia mega, kami chakah ngambi kaban baru sereta numbuhka kaban komiti pengintu pengelantang rama ngambika ngintu pengelantang baka kaban sereta mega sida ti tasah dituntung penusah ngenyit baka penusah angus, tanah tusur tauka bah tunggal ngambi ngelempungka tating penusah sida,” ku explained Ling Thiam Ing nerang silik.
Lis nama komiti baru - Chairman Ling Thian Ing, Sapit Chairman Dato Yong Hua Sying, Mandal Chairman Chu Sing Lung. Sekretari James Ling (Surat Jaku English) enggau Kaunsilor David Wong Hau Ching (Surat Jaku Mandarin). Tukang Wang Loh Tie Ong dibantu Wong Mee Ing. Pemesai Pemadah Chia Weng Kuong lalu disaup Wong Tze Tong, Sekretari Pengatur Anita Wong Siew Ting enggau dibantu Kong Chak Ling. Pemesai Pengintu Pengelantang Kong Siew Ki. Ketuai Nembiak Tommy Wong Chong Wei sereta Ketuai Indu Kaunsilor Jenny Yii Si Geok.
Penyanding Penemu Pemancha Yong Thu Fook, Penghulu Sia Shui Poh, Chu Tung King Sekretari Politik Kepala Menteri Sarawak, Tapah Ata, Pemesai Pekara Khas Sapit Kepala Menteri – Ambrose Abong Bugek enggau Penghulu Sia Shui Poh, bala kaban PBB member Lidam Assam, Alexson Abong, antara bala ke bisi nyempulang penemuai nya.