Program lumba enggau main di sekula nanggam pemanah kaul
BINTANGOR: Program lumba enggau main ke diatur sekula tau bendar nempa mayuh pemaik lebih agi ba pekara penyerakup antara apai indai enggau piak sekula.
Pengari Kaban Kunsil Nengeri (ADUN) Meradong Datuk Ding Kuong Hiing, Joseph Hii madah, awak nya engkeman nanggam agi kaul enggau pangan diri ba tuju ngelawa pemujur sekula baikka ba pelajar tauka ba lumba enggau main.
“Semua kitai bela nemu lumba enggau main mayuh mai pemaik.
“Kelimpah ari nyintalka agi kaul apai indai enggau pengawa tu mega deka ngembing nembiak nempa ulah ti positif baka ngeringka agi pengandal diri, regas, sikal, rindu begulai enggau orang tauka nambahka peleba,” pia ku iya madah maya Pengerami Lumba Enggau Main 2017 Sekula Primeri (SK) Tulai di Bintangor, empai lama.
Bela datai maya tu iya nya Sapit Pemesai Opis Pelajar Pelilih ( PPD) Meradong Nassarudin Ibrahim, Kelapa Pengajar Nicholas Renang enggau Chairman Gerempung Apai Indai enggau Pengajar (PIBG) sekula Markus Dagar.
Nambahka jaku iya, ku Joseph, program lumba enggau main bela tau ngelantangka runding nembiak sekula ari kelalu berundingka pekara pelajar.
“Taja kitai ngemeratka pemujur sekula tang program baka tu dikena kitai mai sida ngelepa runding tauka belelak dulu ari program ba kelas.
“Tu ukai reti ngelengka pemesai reti belajar tang ari program tu mega sida bekunsika peneleba begulai enggau pangan diri,” ku iya madah baru.
Joseph mega andal amat program nya deka nyidi sereta nyungkakka pengelandik nembiak ba lumba enggau main.
Dulu agi ari tu, ba jaku pengelalu iya, Nicholas madahka pengawa lumba enggau main sebagi ari batang pengawa ti ngenataika mayuh penguntung.
Iya madah, ari macham bengkah batang pengawa, pengelandik ba pengawa lumba enggau main udah nyengala dipeda ulih nentuka pengidup meruan dudi hari.
“Bayar ke diberi ngagai sida ke pengelandik baka ba main bol, ‘basket ball’, tenis endang ditemu mayuh nyentuk bisi enda dibayar bulan tang ninting hari.
“Nya alai, pengawa lumba enggau main tu ulih nyadika batang pengawa ti nentuka pengidup meruan jemah ila,” pia ku iya madah.
Ba sekula nya ku iya, pemujur nyadi orang bepengelandik ba lumba enggau main nadai bepenanggul nyadi taja pan nembiak dia mimit.
“Kitai nadai kebuah tau mujur ba pengawa tu baik ngarika sekula, nengeri tauka menua enti kitai ransing,” ku iya madah.
Ba pengerami tu, Joseph bisi besemaya deka meri geran sepenyampau RM2,000 ngagai sekula nya.