MARA dipinta numbuhka pampang Kolej Profesional Mara ba Kapit

KAPIT: Sapit Menteri Pemansang Menua Pesisir enggau Kandang Menua Datuk Alexander Nanta Linggi merambu minta Majlis Amanah Rakyat (Mara) numbuhka sebuah pampang Kolej Profesional Mara (KPM) di Bagi Menua Kapit.

Ku iya, perambu nya digaga dikena meri awak ngagai bala nembiak milik belajar di bagi menua nya.

“Aku minta ngambika Mara numbuhka Pampang KPM ditu diatu nyadika perambu tumu ba pengawa numbuhka sebuah kampus besai nangkup peminta dudi hari,” ku iya.

Nanta ke mega Kaba Parlimen Kapit madah munyi nya lebuh bejadika pengawa nutup Program Penglibatan Mara dan Tuisyen Rakyat Opis Menteri Pemansang Menua Pesisir enggau Kandang Menua ( KKLW)/ Yayasan Pelajaran Mara ditu, kemari.

Sama bisi datai Direktor Mara Sarawak Dr Azmi Amat Murjan.

Ku iya, enggau pemisi pampang KPM, iya mega ulih mantu ngangkatka pemansang modal mensia di bagi menua nya.

Ku iya, iya beratika bisi peminta numbuhka sebuah kampus besai KPM di Kapit dalam timpuh tiga ngagai empat taun da agi.

Nanta ke mega Kaban Parlimen ( MP) Kapit, iya kala minta ngambika sebuah Maktab Rendah Sains Mara (MRSM) ditumbuh di bagi menua nya.

Taja pia, iya dipadah enda ulih dipejalai kandang diatu laban MRSM Betong enggau MRSM Mukah ke bisi diatu apin nyapai tikas ngambi nembiak ti tinggi.

Iya merambu ngambika sebuah Arked Mara ditumbuh di Kapit ngambika mayuh agi endur dagang ulih disedia ungkup bansa Bumiputera ke bisi ati ngaul diri dalam pengawa dagang.

Berindik ari nya, iya minta ngambika Mara nambahka agih belanja dikena mantu orang dagang di Kapit kelebih agi raban kunteriktor mit ti enda chukup puku dikena bejalaika kereja pemansang di bagi menua nya. — Bernama