Pengilap bansa tu ngujungka kus pelajar ti diambi enda setipak enggau peminta ba makit kereja dudi ari
KAPIT: Menteri Muda Nembiak enggau Lumba, Datuk Snowdan Lawan ngelalau bala nembiak Pom Lima, Pom Enam enggau sida ti lepas sekula, sida meseti berunding memanah nama ti deka digaga pengudah tembu besekula.
Ku iya, mayuh sida ngaga pengilap nitihka bala bakih maya nampung pelajar, ngujungka pelajar ti diambi sida enda tetangkupka peminta ba makit kereja.
Tu semina masau jam enggau belanja laban mayuh bala graduet nadai kereja ketegal salah pilih kus laban nitihka bala bakih enggau nadai berundingka kus nya ungkup pengidup sida emp dudi hari.
“Sida ti lepas sekula meseti berunding memanah. Ukai semua orang nyulut ba pelajar akademik. Anang buta milih kus ketegal nitih bala bakih maya nampung pelajar.
“Bepikir panjai dalam milih kus, ngambika setipak enggau kereja kita dudi hari sereta tetangkup pengawa puang ke bisi dalam makit kereja.
“Pekara tu beguna endar laban kelalu mayuh graduet nadai kereja diatu ketegal pelajar ti diambi sida enda setipak enggau makit kereja.
“Kelimpah ari pelajar akademik, ngagai sida ti enda entu nyulut ngambika rejista ba kolej vokasional tauka palan latih pengelandik ngambika nyikap diri ngena pengelandik.
“Makit kereja dudi hari kelebih agi ba industri begunaka setipikit,” ku Snowdan nerang silik lebuh iya bejadika Ekspo Kerjaya enggau Program Pelajar Kapit 2017 diatur kena Hari Enam enggau Hari Minggu, di Stadium Tetutup Bletih.
Snowdan ngarika Sapit Kepala Menteri Sarawak, Tan Sri datuk Amar Dr James Jemut Masing bejadika program nya.
Iya meri pengaga ati ngagai Tabung Ekonomi Gagasan Anak Bumiputera Sarawak ( TEGAS) enggau Agro Pemuda PRS ti udah mujur ngatur program pulaika pemaik ngagai bala nembiak di kandang menua pesisir.
Pia mega ku iya, perintah enda deka nejuka bala nembiak di menua pesisir tinggal di belakang laban program tu nyadi pelasar nyediaka penerang beguna ungkup kereja dudi hari.
“Aku deka meda raban nembiak di Kapit tampak pegari. Kita meseti bisi juluk tinggi enggau besai, menua tu bepanggai ba penau enggau pengulih raban nembiak kemaya hari.
“Batang tuju Transformasyen Nasional 2050 (TN50) enggau Nengeri datai ba taun 2030, baka ni menua deka kaya dalam kandang 18 ngagai 30 taun berengkah ari diatu. Perintah deka nemu nama aspirasyen raban nembiak kemaya hari.
“Nya kebuah, kita meseti berundingka sapa kita ila – injinir, arkitek tauka akauntan, sereta ke bukai,” ku iya nerang.
Ku Snowdan, Perintah Nengeri ngagihka RM30 juta dikena ngaga ‘Digital Village’ di Kuching. Ku iya, kemaya hari, tetiap iku nembiak bisi telefon binching enggau media rama (Facebook, WhatsApp, WeChat, enggau ke bukai).
Ku iya, Digital Village - State of Ary of Technology, sereta meransang bala nembiak ngambi pelajar teknologi sains enggau injinir tauka kus teknikal maya sida nampung pelajar.
Ekspo Kerjaya enggau Program Pelajar Kapit 2017 udah meda 35 bengkah palan belajar nirika bangsal sida nyediaka servis rejista enggau meri penerang ngagai bala apai indai enggau nembiak.
Pengudah nya Snowdan bisi ngabas mayuh bengkah kaunter.
Nimbal peminta dibantaika Kaban Parlimen (MP) Hulu Rajang, Datuk Wilson Ugak Kumbong ngambi ngaga stadium lumba tebuka baru (main bol) enggau stadium tetutup (badminton), Snowdan nyemetak madah di baruh Mid-Term Review, bisi stadium tebuka baru di Kapit lalu iya mega ngemendarka RM50,000 dikena ngemanahka stadium Bletih ke lama.
MPHuluRajangDatukWilson Ugak Kumbong, ADUN Pelagus Wilson Nyabong Ijang, Ketuai Pemesai Operating TEGAS, Awangku Merali Pengiran Mohamad, Sekretari Politik Kepala Menteri Sarawak Nicholas Kudi Jantai enggau Charles Wilfred Nissom, Pemesai Pelilih Bukit Mabong Douglas Pungga, Temenggong Tan Kian Hoo, Penghulu Daniel Dian, Penghulu Sallang Batang, Kapitan Yiap Yii Hoo sereta bala bukai bisi ngulu program ke diatur.
Bepikir panjai dalam milih kus, ngambika setipak enggau kereja kita dudi hari sereta tetangkup pengawa puang ke bisi dalam makit kereja. Datuk Snowdan Lawan Menteri Muda Nembiak enggau Lumba