Perintah nengeri diansak ngambi berunding nikika elawin raban kaunsilor
SIBU: Perintah nengeri diansak berunding ngambi nikika elawin ungkup bala kaban kaunsil tauka kaunsilor, ti chakah gawa mantu raban kaunsil kandang menua (PBT) mutarka isu sereta penanggul ngaul mensia mayuh.
Chairman Kaunsil Pelilih Menua Pesisir Sibu (MDLBS), Sempurai Petrus Ngelai ti mantaika perambu ari penemu iya empu madahka, kaban kaunsil suah bejalai gawa ngagai menua, mereti sereta mutarka penanggul rayat, endang patut elawin sida ditiki.
“Tu semina penemu ari aku empu. Aku pechaya perintah nengeri mega patut nikika elawin bala kaban kaunsil. Ari sukut pangku pengawa, bala kaban kaunsil bela bejalaika servis perintah kelebih agi di kandang menua pesisir,” ku iya.
Kemari, Sapit Kepala Menteri Datuk Amar Douglas Uggah madahka perintah nengeri besetujuka elawin ketuai raban bansa enggau ketuai komuniti ditikika RM100, berengkah ari taun baru.
Ku Uggah, peniki elawin nya dikena ngaku pemesai guna enggau pemanah pengawa bala ketuai raban bansa enggau ketuai komuniti dalam sistem bejalaika servis, kelebih agi di kandang menua ulu.
Nitih ku Sempurai, bala kaban kaunsil deka bejalai gawa sereta ngulihka penerang bekaul enggau penanggul rayat sebedau ngeripot terus ngagai piak PBT.
Sida chakah ngaul diri ku iya, ngujungka pangku pengawa bala kaban kaunsil inklusif agi laban sida dulu agi meretika gaya lalu ngemai iya ngagai PBT ngambika diputar.
“Ba pekara tu, aku pechaya endang patut elawin sida ditiki, ke alai diatu sida semina ulih minta elawin aum komiti tetap enggau pejalai baum,” ku iya.
Berebak enggau nya ku Sempurai, pemanah penyapai ba pengawa raban kaunsil dipantau nengah KPI sida lalu ukai semina ngulu aum di PBT sida empu.
Kelimpah ari nya ku iya, sida mega suah bejalai gawa maya nerima sebana tauka ripot ari mensia mayuh, kelebih agi bekaul enggau servis kaunsil.
“Aku nandu baru, ari penemu diri empu, sida endang patut ditikika elawin ngambika sida ulih bejalaika pangku pengawa enggau sikar agi.
“Nya kebuah, aku ngarapka perintah nengeri deka berunding nambahka elawin ngagai bala kaban kaunsil,” ku Sempurai.