Palan Festival Buah enggau Nanas 2017 udah dibuka
SARIKEI: Palan Festival Buah enggau Nanas Sarikei 2017, udah dibuka ngagai mensia mayuh belabuh ari kemari, taja dipeda agi nyediaka diri.
Taja nyauka semua bangsal bejual di sepanjai Jalai Makit, Jalai Central enggau Jalai Kubu Lama mega udah berengkah dibuka bejualka barang ari urung pukul 9 pagi, mayuh bengkah ejensi perintah agi ngatur pengawa nirika bangsal pengawa mandang sida empu.
Raban pengatur mega benung kiruh nyediaka perengka guna kelebih agi nentuka panggau besai udah sedia ungkup pengawa bejadika pengerami, dipelaba deka dipenyadi Sapit Kepala Menteri, Datuk Amar Douglas Uggah Embas, urung pukul 10 pagi, sehari tu.
Antara komponen besai pengerami diatur ninting hari nyentuk 26 November tu iya nya Kampung Digital Agro Sarikei, Dapur Sarikei, Pengawa Mandangka Rampa, Bazaar Balai Dagang Bumiputera Sarawak (DUBS) lalu berengkah ari 20 ngagai 25 November deka diatur Hari Nerima Penatai Mensia Mayuh Palan Inovasyen Sarikei.
Pekit main enggau lumba baka Futsal, Badminton, Dart, Iron Lady Cross fit Challenge, Mr. Body fit; pekit berapi; pekit ngelinsu nembiak mit, sereta ke bukai nyadi sebagi ari aktiviti ninting hari.
Program diatur pulaika pemaik mensia mayuh iya nya Beperesa Pap Smear nadai bebayar, servis Perubat Pakar enggau pengawa meri darah.
Beserimbai enggau pengawa bejadi pengerami sehari tu, Rick Ell bisi dikangau merindang mensia mayuh serata raban artis rikoding ke bukai dikangau merindang ba muakka malam hari baka Nick enggau Shellac hung, Shidi ( Kumpulan Data), Johnny Aman sereta Zamery Amera.
Pengerami deka tembu kena 26 November tu lalu pengawa bejadi nutup deka dipenyadi Menteri Muda Perambu Mengeri, Pengatur Tanah enggau Rampa Menua, Datu Len Talif Salleh udah ditetap kena lemai 24 November.