Palan pematih pengelandik ungkup orang besai tuai digaga di Serian
SERIAN: Palan latih, servis ungkup penempa pengelandikenggau pengelandik tinggi ungkup orang besai tuai kelebih agi di Sabah enggau Sarawak, deka ditumbuh di Serian.
Menteri Pengatur Pengereja Pengawa, Dato Sri Richard Riot Jaem, ngemendarka perambu palan latih deka ditumbuh nengah Human Resources Development Berhad (HRDB).
Ku iya, kaban kaunsil HRDB, ba peminta iya, udah ngemerandar perambu palan latih Human Resources Development Fund (HRDF) ungkup Sabah enggau Sarawak, ti deka ditumbuh di Serian.
“Bala kaban kaunsil HRDB, panel pemeranak puku, udah ngemendarka iya. Nya alai, aku ngarapka iya ulih dilanchar sebedau Pengawa Bepilih Besai Ke-14 (PRU14).
“Tu ukai semaya bula. Aku enda madahka iya ketegal pengawa bepilih. Iya udah nyata je alai palan ti diperambu tu udah dikemendarka bala kaban kaunsil HRDB,” ku iya ba mua bala mayuh rambau ngelancharka program Kerjaya enggau Pelajar Pengelandik ditu, kemari.
Riot, ke mega Kaban Parlimen (MP) Serian, madah enggau Palan Latih Industri (ILP) udah dikemendarka Menteri Besai sereta Palan Latih HRDF ti udah dike- mendarka kaunsil HRDB, semua pekara bekaul enggau latih pengelandik diatu betumpuk ba Serian.
Iya nandu, palan latih HRDF deka nangkup semua ari Sabah enggau Sarawak.
“Tu gaya Serian ke diatu lalu pagila sereta nyema aku ukai Menteri Pengatur Pengereja Pengawa, aku enda berundingka kitai deka bisi ILP enggau palan latih HRDF ungkup bala pekereja bepengelandikenggau bepengelandik tinggi ba Serian.
“Nya alai, maya pengawa bepilih tu ila, kita nemu nama ke patut digaga. Nyema kita enggaika iya, nadai ngawa, tang ba penemu aku, semua kita begunaka palan latih tu.
Aku pechaya enggau pemisi ILP enggau palan latih HRDH di Serian, mayuh nembiak lelaki di Serian deka nyadi pekereja bepengelandik dalam mayuh bengkah bidang dudi hari.
Ngelansa pasal perambu ILP, ku Riot, kereja ba projek diperambu nya dipelaba deka berengkah digaga dalam kandang empat bulan da agi.
Minggu nyin kemari, ba pengawa nyuaka geran diatur di Ranchan ditu, iya ngemendarka ILP bar deka ditumbuh di Serian, tambah ngagai palan ke bisi diatu di Sarawak.
Ku iya, Menteri Besai Datuk Seri Najib Tun Razak udah ngemendarka palan diperambu ungkup Serian, seraya nambah, taba ungkup projek ILP diperambu nya udah dikelala lalu iya diatu datai ba tikas tinda.
Diatu bisi 32 buah ILP di serata Malaysia, nyengkaum sebuah di Samarahan, Miri, enggau Bintulu.
Sama bisi datai rambau pengawa ngelanchar nya, Ketuai Pemesai Eksekutif HDRB Dato’ CM Vignaesvaran Jeyandaran enggau Pemesai Pelajar Pelilih Serian, Yunus Apok.