Bup leka jaku Kedayan patut dichelak sereta disadung: Awang Tengah
BEKENU: Bup tusun leka jaku Kedayan patut ditempa nengah kerejasama enggau Dewan Bahasa dan Pustaka (DBP) ngambi ulih dichelak sereta disadung ngagai mensia mayuh sereta nentuka jaku nya meruan idup sereta bisi belama seriris enggau penetap perintah nengeri nerenakka penyerakup dalam pengelain di Sarawak.
Sapit Kepala Menteri enggau Menteri Pemansang Mengeri Enggau Pengeraja Asal Kedua, Datuk Amar Awang Tengah Ali Hasan mansutka pekara tu rambau bejadika Malam Budaya enggau Pekit Pemajik Gamal Kepala Kapo nyerumba Pengerami Makai Lemai Serumpu Besai Kedayan Ninting Taun Miri diatur di Kampung Danau di Bekenu kena malam Hari Lima.
“Jaku tu, enggau pengeraja asal ba main asal Kedayan, adat, pemakai asal, pekayan enggau ke bukai, patut ditan ungkup rebak dudi,” ku iya.
Iya deka nyukung pengawa nyadung bup tusun leka jaku enggau sukung belanja taun baru.
Awang Tengah, ke mega Menteri Industri enggau Pemansang Pengawa Dagang madahka bansa Kedayan nyadi raban minority meseti ngetanka penyerakup sida sereta gawa rat begulai enggau bala komuniti bukai di Sarawak ngambika mansang.
Juluk begulai ungkup pengelantang peranak Sarawak enggau nengeri tu ke alai Kepala Menteri Datuk Patinggi Abang Abdul Rahman Zohari Tun Openg udah ngagihka belanja dalam Bajet 2018 enggau insiatif ngemai nengeri tu nyingkang ke mua.
Ku iya, pengawa industri di nengeri tu nyadi sebagi ari chara nyungkak ekonomi rayat, bajet tu deka nyediaka rampa ti kondusif agi ungkup pemansang Industri Mit enggau Jelan Pemesai (IKS), nyengkaum sida di genturung pendiau.
Ekonomi digital deka nyadi ‘game changer’ ngagai raban minoriti laban kreativiti enggau pemintar runding sereta pemaik ukai semina ungkup komuniti sida aja, tang mega mensia laban nadai sekat agi dalam dagang.
“Ekonomi digital, online enggau pelasar e- dagang nyediaka peluang ke alai semua orang ulih beambi ulih,” ku iya.
Sapit Kepala Menteri ngansak bala komuniti nyeliahka bala anak sida ari pengawa salah guna dadah enggau penanggul rama tang ngemeranka pemesai guna pelajar nyadika senjata ngambi bagi dalam renggat pemansang Sarawak udah tu sereta mansang.
Ba lansa ke bukai, Menteri Muda Orang Indu, Ruang Bilik enggau Pemansang Anak Mit, Rosey Yunus, dalam jaku dipansutka iya, madahka diri temegah ati enggau komuniti Kedayan di Borneo ti udah mujur ngatur pengerami ungkup taunt u.
Ku iya, tu pengerami ti besai reti ba adat asal Kedayan ti meransang interaksyen antara bansa Kedayan enggau komuniti bukai di Sarawak, lalu dikearap iya seruran ulih dikemayuh sereta ngetanka main asal enggau adat raban etnik nya.
“Bisi mayuh pesaka asal, ti ditinggal nadai dokumen, tau punas sereta lenyau diseruyut jeman, lalu kitai ngarap ulih ngetanka iya nengah pengawa dokumentasyen,” ku iya.
Tanda asal, lagu enggau silat ti dibantaika komuniti Kedayan datai ari Bekenu, Limbang, Lawas, Brunei, Labuan enggau Sabah ngasuh urung 1,000 iku teperindang.
Sama bisi datai Kaban Parlimen (MP) Sibuti Datuk Ahmad Lai, Kaban Kunsil Nengeri (ADUN) Lambir Ripin Lamat, Pemesai Pelilih Subis Hussini Bekir, bala ketuai raban bansa enggau genturung pendiau Kedayan di sitak Bekenu.
Seraya Haziani Sarbini udah dipadu bulih gelar Kepala Kapo Beauty Queen, ngalahka Nurul Natasha Hj Junaidi enggau Emma bt Sahari, menggi penuduk kedua enggau ketiga dalam pekit nya.
Sida tiga nerima perais mata duit RM800, RM600 enggau RM500, disempulang enggau trofi, segempung bungai.