Insentif RM2,000 deka ngeransingka staf perintah nengeri meri servis ti manah Kami (CUEPACS) meri besai terima kasih ba insentif khas sebulan gaji tauka abis nadai RM2,000 ngagai semua orang gawa perintah nengeri ti udah dibantaika ba pengawa bejuraika B
SIBU: Kongres Serakup Orang Gawa Perintah (CUEPACS) Sarawak nerima manah pekara dibantaika Kepala Menteri Datuk Patinggi Abang Johari Tun Openg bekaul enggau pengawa meri insentif khas sebulan gaji ngagai orang gawa perintah nengeri tu.
Presiden CUEPACS Sarawak (CNS) Ahmad Malie madah, insentif tu deka nyadi insentif pemadu manah ti deka diterima orang gawa perintah nengeri laban udah lama sida nerima insentif penyampau RM500.
Berindik ari nya, iya ngansak orang gawa perintah nengeri ngambika terus nyukung enggau meri servis pemadu manah ngagai rayat dikena malas jasa perintah nengeri.
Ahmad ngelansa pekara dibantaika Kepala Menteri lebuh ti nyimpul jurai jaku kena Hari Lima tu tadi ke alai keterubah iya perintah nengeri deka meri bayar insentif khas ngagai semua orang gawa perintah nengeri sebela enggau pugu gaji sebulan tauka abis nadai RM2,000.
“Kami (CUEPACS) meri besai terima kasih ba insentif khas sebulan gaji tauka abis nadai RM2,000 ngagai semua orang gawa perintah nengeri ti udah dibantaika ba pengawa bejuraika Bajet 2018 ungkup Sarawak.
“Ngagai bala staf gawa perintah, CNS tentu lantang ati nerima berita manah tu seraya nyemetak madah iya insentif pemadu manah kala diterima orang gawa perintah nengeri pengudah nerima insentif sepenyampau RM500 ngelama tu.
“CNS meri terima kasih ngagai perintah nengeri di baruh pegai Kepala Menteri Datuk Patinggi Abang Johari Tun Openg. Insentif ti dibantaika tu nyata ngayanka perintah nengeri berati sereta meretika nasit bala staf gawa perintah nengeri tu,” ku iya.
Berebak enggau nya, iya mega ngansak orang gawa perintah nengeri - kelebih agi sida ti bepenatai pemisi jelan iya, bekelimatka insentif ti deka diterima enggau ngemeratka belanja ba pekara sekula taun baru.
Berindik ari nya, Ahmad mega ngarapka perintah nengeri meri insentif khas ngagai semua orang gawa perintah nadai ngira sekalika sida staf perintah nengeri tauka perintah besai rambau mantaika belanja dudi hari, kelai ngenang pemanah pengawa sida seruran gawa ngemansangka Sarawak.
Ahmad Malie Presiden CUEPACS Sarawak