BSMM Sibu nerima RM55,000 nengah program ‘Run For Health Joggerthon 2017’
SIBU: Gerempung Bulan Sabit Merah Malaysia (BSMM) Pelilih Sibu mujur bulih RM55,000 nengah program ‘Run For Health Joggerthon 2017’ ke diatur sida, kemari.
Nitihka dipadah Chairperson Komiti Pengatur Teresa Wong, program ninting taun nya nerima sukung ke manah ari mensia mayuh.
“Pia mega, kompeni Ta Ann bisi nyuaka pemeri sepenyampau RM10,000 kelai nyukung program tu,” pia ku iya madah.
Program nya dipenyadi Eksekutif Direkter Kompeni Ta Ann Simon Wong ti ngarika Ketuai Eksekutif kompeni nya, Dato Wong Kuo Hea.
Sama bela datai maya tu iya nya Chairman BSMM Pelilih Sibu Penghulu Chua Hiong Kee.
Nambahka jaku iya, ku Teresa, kompeni Ta Ann ukai semina datai nyuaka bantu nya taun tu aja tang mega suah meri bantu ngagai sida sebedau tu.
Ketegal nya, iya ngarika gerempung sida meri besai terima kasih ngagai kompeni Ta Ann ti semampai nyukung ngelama tu.
“Asil ke diulih kitai ba program tu deka dikena bejalaika program gerempung baka nyaup mensia mayuh ke bisi penusah.
“Tu besai reti laban piak kami nadai nerima geran ari perintah,” ku iya nerang.
Program nya dibagi ngagai empat kategori iya nya 18 taun ke baruh (Lelaki enggau Indu), 45 kebaruh (Lelaki enggau Indu Tebuka), 46 taun ke atas (Veteran Lelaki enggau Indu) enggau 58 taun (Lelaki enggau Indu).