JASA begunaka kerejasama mensia mayuh ngemujurka pelin perintah

KAPIT: Saup ari mensia mayuh di sitak Kapit beguna dikena Opis Pekara Khas ( JASA) nentuka pelin perintah ulih dipejalai nitihka langgur sereta mujur mai penguntung ngagai rayat.

Sapit Direktor JASA nengeri Anwar Hanafi Ardimansyah madah, saup tu ku iya, baka ngenataika isu, penemu enggau penerang ari sitak tauka pelilih menua diri ngagai piak sida.

“Taja pan baka nya, kitai andal amat penerang ke dibantai tu endang amat sereta engkeman nitihka nama pekara ke deka dipa- dah sebedau dibai ngagai piak ti bekaul baka ngagai perintah nengeri,” pia ku iya madah.

Iya mantaika jaku tu maya ba program ‘ Engagement With Community 2017’ ke diatur JASA Sitak Kapit ditu, empai lama tu tadi.

Anwar madah, pelin perintah tu nyengkaum pekara ba bajet ti dibantai Menteri Besai alai penerang ari mensia mayuh baka ari Gerempung Ukai Dikuasa Perintah (NGO), raban politik, ketuai raban bansa beguna dikena ngemanahka agi pelin ke udah disebut nya.

“Bisi mega pelin perintah tu tau diubah mimit ngambika nama langgur pemansang ungkup rayat ulih mujur agi sereta mai penguntung ngagai semua.

“Tu nyengkaum rayat di Kapit ditu laban agih belanja dikena ngaga pelin pemansang ba bajet mungkur semua endur.

“Nya alai, penemu enggau penerang ari renggat baruh beguna amat,” ku iya madah baru.

Seraya nya ku iya, ukai semina bekena saup meri penerang, piak sida randaka kaul ke manah begulai enggau mensia mayuh.

Ba pekara ti bukai, Anwar madahka dalam kandang setaun ngagai dua taun tu, sitak Kapit deka dipeda majak mansang kelebih agi enggau pemansang jalai alun.

“Aku pechaya semua kitai ditu melabaka sitak Kapit deka mansang agi enggau penatai projek jalai alun.

“Taja empai tembu silik, mensia mayuh ari menua bukai udah datai ngelawa sitak tu.

“Kitai ngarapka rayat ditu nemu ngambi awak ari pemansang tu tang seraya nya tanka pemanah kaul pupu raban bansa enggau gaya idup kita di menua tu,” pia ku iya madah.

Sama bela datai ngemujurka program tu iya nya Ketuai JASA Sitak Kapit Matan Yok, Temenggung Wilfred Billy Panyau, bala kaunsilor sereta bala bukai.