Projek BALB ungkup 50 buah rumah panjai di Beluru tembu Ogos 2018
MIRI: Sepenyampau 1,387 ruang bilik ti datai ari 50 buah rumah panjai di kandang menua Beluru, Baram deka ngasaika bekal ai beresi berenggat dalam bulan Ogos 2018.
Menteri Bekal Ai enggau Elekterik Menua Pesisir Sarawak, Dato Seri Stephen Rundi Utom madahka projek enggau kesemua penyampau ungkus RM63 juta nya deka tembu berenggat ngaul 50 buah rumah panjai.
“Projek nyambung batang paip sepemanjai 126 kilometer nya deka ngaul pengawa nyambung tujuh batang paip besai ti mungkur kandang menua Bakong, pasar Beluru, sepanjai jalai Beluru enggau Jalai Long Teru,” ku iya rambau Pengawa Bejadika Projek Bekal Ai Menua Pesisir (BALB) Pelilih Beluru di Rumah Pengabang Janang kemari.
Ku Rundi, pengawa nyambung paip ai nya deka mutarka penanggul peranak di kandang menua Beluru ke sebedau tu bepanggai ba ai ujan ti ditimbun enggau ai sungai.
“Perintah mendingka tetiap peminta rayat kelebih agi perengka guna pemun menua pesisir, berindik ari nya, perintah udah ngemendarka agih belanja dikena nembuka projek BALB ditu,” ku iya.
Ku iya, projek nya deka tembu berenggat datai ba pengerami Gawai taun baru lalu dikearap peranak rumah panjai bekaul ulih liat ati seraya nganti projek nya dipejalai.
Projek tu ku iya, dipelaba deka tembu dalam bulan Ogos 2018, tang piak kunteriktor udah besemaya iya deka ditembu berenggat datai ba Gawai taun baru.
“Bisi rumah panjai deka ngasaika perengka guna tu tumu agi seraya endur bukai benung disambung, peranak rumah panjai patut bekerejasama nyema pengawa nyambung paip tu ba atas tanah sida,” ku iya nerang.
Ku Rundi, bekal ai mata nya deka diambi ari Batang Baram berindik ari penyuntuk ai mata ari Sungai Bakong.
“Ai mata Sungai Bakong enda chukup lalu perintah ngiga alternatif ngepam ai mata ari Batang Baram dikena nampung kapasiti guna di kandang menua nya ila,” ku iya.
Iya pechaya, datai ba taun 2025, Sarawak deka bisi bekal ai beresi ti likun diirup ti mungkur semua kandang menua pesisir, genturung pendiau sereta jalai tebing tasik.
Rundi mega ngarapka rayat di menua pesisir meretika pejalai pengawa ba peminta bekal ai ti diatur ejensi perin- tah laban bisi maya iya begunaka timpuh ti lama.
“Kitai ngarapka rayat meretika ejensi bejalaika pengawa mega patut minta agih belanja ari perintah dikena bejalaika projek pulaika pengelantang rayat di menua pesisir,” ku iya nerang.
Sama bisi datai Kaban Parlimen (MP) Baram, Anyie Ngau, Menteri Muda Kaunsil Kandang Menua Datu Penguang Manggil, Menteri Muda Bekal Ai Datuk Liwan Lagang, Residen Miri, Sherrina Hussaini, Pemesai Pelilih Beluru, Mohamad Rashdan enggau Tuai Rumah Pengabang Janang.