Tuju numbuhka PI1M dikena nempa komuniti landik IT sereta pintar nyerenih bemacham penerang
MIRI: Bala komuniti patut nguna memanah Palan Internet 1Malaysia (PI1M) ngulihka penerang sereta ngelengkaska pengerembai ekonomi digital ke maya hari.
Kaban Kunsil Nengeri (ADUN) Piasau Datuk Sebastian Ting madahka batang pangku pengawa tuju numbuhka Palan Internet 1Malaysia dikena nempa komuniti landik IT sereta pintar nyerenih bemacham penerang.
“Nengah pengawa bekenaka internet, kitai ulih nambahka penatai pemisi enggau chara ti jampat agi, iya nya ‘online’ nengah media rama, website enggau ke bukai kemaya hari.
“Ukai semina ari sukut ekonomi aja, tang mega ari pekara bukai ti begunaka kitai ngena teknologi pemadah enggau arus penyambung (ICT) dalam bidang pengawa pengawa enggau ke bukai,” ku iya.
Sebastian mansutka jaku nya lebuh bejadika Program Hari Nerima Penatai Mensia Mayuh Palan Internet 1 Malaysia Piasau, kemari.
Nengah pengawa bekenaka internet, kitai ulih nambahka penatai pemisi enggau chara ti jampat agi, iya nya ‘online’ nengah media rama, website enggau ke bukai kemaya hari. ADUN Piasau Datuk Sebastian Ting
Nitih ku iya, bemacham inisiatif ari perintah ngerichahka agi pengerembai ekonomi digital kelebih agi komuniti menua pesisir.
Iya ngarapka peranak di menua nya ulih beratika pekara tu positif dikena ngemansangka diri, menua enggau bansa.
Palan Internet 1 Malaysia Piasau udah berengkah dibuka kenyau ari Januari 2017 tu tadi lalu nyadi pelasar ngenyemakka takah digital komuniti di mengeri enggau menua pesisir.
Palan Internet ukai semina endur bemain enggau bekenaka internet aja, tang mega nyadi palan ngulihka penerang, penemu enggau ke bukai.
Sebastian ngarapka semua serak komuniti di Piasau ulih ngena memanah perengka guna enggau servis ke bisi disediaka di Palan Internet nya.