Palan Informasyen Kedayan deka ditumbuh di Bekenu
MIRI: Palan Informasyen Kedayan ( KDC) deka ditumbuh di kandang menua Bekenu enggau langgur belanja penyampau RM900,000 ba pengawa numbuh enggau ngemesaika kaul raban bansa di serata Sarawak nyengkaum di Sabah, Labuan enggau Brunei Darussalam.
Perambu nya udah dikemendarka Kepala Menteri Datuk Patinggi Abang Johari Tun Openg lalu iya madah palan nya deka ngempung penerang pasal komuniti Kedayan di nengeri tu dikena numbuhka pengatur pengawa ti meruan agi ba mayuh bengkah pekara.
“Projek Palan Chuan Penerang Kedayan dipelaba deka berengkah digaga dalam suku keterubah 2018 lalu deka tembu dalam kandang dua taun ba taba ti udah ditetap. Iya deka nyadi endur ngagai kitai ngemansangka diri empu ba kuing kitai nyapai juluk dalam dunya ekonomi digital.
“Ari palan penerang tu, kitai deka ulih nemu pemujur ekonomi komuniti Kedayan enggau sektor ti ulih dikemansangka kitai nyengkaum dagang temuai.
“Ari sambung internet ti manah sereta meruan agi, iya mega deka nyadi pelasar ngerapitka tanggam kaul antara komuniti Kedayan di serata nengeri nyengkaum sida ari Limbang, Lawas, Rambungan enggau Brunei lalu nyadi pematak dagang temuai enggau main asal ke baru ditu, di Bekenu,” ku iya.
Abang Johari mansutka pekara tu lebuh bejadika Program Pemesai Begulai Enggau Rayat Nyerumba Pengerami Makai Lemai Taun Besai 2017 di Kampung Danau di Bekenu,.
Ku iya, palan nya deka disikap ngena bemacham perengka guna nyengkaum infrastruktur teknologi pemadah enggau arus penyambung ( ICT) terus nyadi pelajar endur mantaika produk enggau servis ke bisi disediaka peranak Kedayan.
Tu nyenkuam servis bemalam di genturung pendiau, produk betanam betupi, pakej nemuai ti deka nyungkak status ekonomi komuniti.
“Aku ngarapka begunan tu ila deka nyadi pesaka besai bukai komuniti Kedayan ba pengawa ngintu pesaka main asal sida ari punas,” ku iya nambah.
Berebak enggau program nya, Abang Johari mega ngemendarka agih belanja penyampau RM100,000 ngagai Wang Turu Pelajar, Serakup Kedayan Sarawak (Perkasa).
“Agih belanja tu mega dikena meri peransang ngagai bala anak kitai ngambika terus ngaul diri dalam pelajar Sains enggau Matematik, seriris enggau pemansang teknologi digital ti majak ngerembai,” ku iya nambah.
Nangkan nya ku iya, Pengerami Makai Lemai Taun Besai udah diatur enam kali naka ke diatur begulai komuniti Kedayan di Kampung Danau enggau kandang besemak iya deka dipasuk dalam kalinda dagang temuai nengeri berengkah taun baru.
Sekeda bangsal didiri ba endur ngatur pengerami nyengkaum iya ti mandangka gaya idup komuniti Kedayan nyengkaum adat jadi melaki bini, nyambut pengada, herba enggau ubat, barang pengias enggau asil pengelandik jari, muzik enggau seni, lumba sereta pemakai asal.
Bansal didirika peranak ari genturung pendiau besemak enggau Kampung Danau baka Kpg Pintasan Tiris, Kpg Angus, Kpg Keluru Tengah, Kpg Terahad, Kpg Keluru Jaya, Kpg Subak, Kpg Sinop, Kpg Peliau, Kpg Kejapil, Kpg Kepayang, Kpg RancahRancah, Kpg Kayu Kapor sereta Kpg Bulau.
Lebih ari 2,000 iku pengusung ti ngulu pengerami mega bisi diperindang enggau tanda ari bala nembiak Sekula Sekondari (SMK) Bekenu.
Bini Abang Johari,Datin Patinggi Dato Juma’ani Tuanku Bujang, Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah, Menteri Muda Orang Indu, Ruang Bilik enggau Pemansang Anak Mit Rosey Yunus, Menteri Muda Kaunsil Kandang Menua Datu Dr Penguang Manggil, Kaban Parlimen (MP) Sibuti Datuk Ahmad Lai Bujang, Residen Miri Sherrina Husaini enggau Kaban Kunsil Nengeri (ADUN) Lambir Ripin Lamat ke mega Chairman Perkasa antara bala ke bisi datai ngulu pengerami nya.