Gerempung Dayak merambu deka ngaga Gempuru Likun 2.0

KUCHING: Gerempung Dayak di nengeri tu dijangka deka ngatur siti agi Gempuru Likun 2.0 di Miri dalam kandang berapa bulan tu ila berindik ari gempuru likun ke udah diatur di Kuching kena 8 November tu tadi ti bekait enggau tanah adat bansa asal (NCR).

Nitih ku penerang ke diterima madahka aum bekait enggau gempuru likun nya deka digaga kena 3 Disember tu ila, lalu endur baum bedau diputuska agi sekali ka deka digaga di Miri tauka di Sibu.

Ku pemadah nya baru, gempuru likun ke disadang deka digaga dalam kandang berapa bulan tu ila iya nya deka madah ngagai perintah, gerempung Dayak sereta komuniti Dayak di menua tu balat endar betatika penanggul ke ditapi sida bekait enggau tanah NCR sereta empas ari pemayuh bechara ke alah baik nya di Kort Besai di nengeri tu tauka Kort Besai perintah besai.

“Kami tetap betatika undang-undang menua enti deka ngatur gempuru likun nya, lalu permit polis sigi deka dipinta.

“Tuju pemerat ngaga gempuru likun tu laban deka ngansak perintah nengeri mutarka Kod Tanah Sarawak ( SLC) enggau lengkas, lalu ti kedua, ngansak perintah nengeri meri chara mutarka pekara tu dalam timpuh ke pandak baka kediatu ( seraya nganti pekara bekaul NCR tu dibai ngagai Aum Kunsil Nengeri bulan Mei taun baru tu ila).

“Laban enti nyau nganti datai ngagai bulan Mei 2018 tu ila, ari diatu mayuh agi tanah NCR deka lenyau, sereta alah bechara dalam kort, lalu majak nyelaie pemutus hakim ila (baka kes Tr Nyutan),” ku pemadah nya.

Kena 8 November tu tadi, gempuru likun NCR bisi diatur di Kuching, ba tiga bengkah endur, iya nya di Kort Besai Kuching, belakang Komplek Kunsil Nengeri Lama, enggau ke pengabis mayuh digulu beribu mensia mayuh ari serata nengeri iya nya di Kort Lama ditu.