Pengawa nanam kampung simpan deka meri alternatif kayu kelimpah ari ngena kayu batang ari kampung asal
SIBU: Perintah serius meransang industri kayu batang ngambika ngereja pengawa nanam kampung simpan (planted forest) laban bekal kayu batang ari kampung asal majak kurang.
Sapit Kepala Menteri Datuk Amar Awang Tengah Ali Hasan madahka tu nentuka enda kelalu bepanggai ba kampung asal.
Ku iya, Sarawak benung ngemunka guna produk kayu ari industri ti nangkan ke nya sereta berunding deka ngangkatka tikas guna kayu lalu ngena enggau naka ulih kayu ke ditanam seriris enggau polisi perintah diatu.
“Laban bansa kayu ti diulih ari kampung ke ditanam bebida ari kampung asal ari sukut pengering, patut bisi peminta bejalaika pengawa mansik enggau ngemansang dikena nempa kayu batang nyadi produk kayu ke digaga ti ulih dikena dalam industri ti nangkan ke nya.
“Penyukung reka bentuk ti mampan merambu ngena kayu ti digaga ke ulih ditempa ari kayu mit ari ke nebang kayu ti besai.
“Tu maya nya spesis kayu ke ditanam diguna bendar,” ku iya sebedau bejadika program baru University College of Technology Sarawak (UCTS), Bachelor of Technology (Honours) in Wood Processing, enggau Centre of Excellence in Wood Engineered Products (CeWEP) ditu, kemari.
CeWEP tu kerejasama entara UCTS, Sarawak Timber Industry Development Corporation ( STIDC) enggau Sarawak Timber Association (STA).
Awang Tengah, ke mega nyadi Menteri Pemansang Mengeri Enggau Pengeraja Asal Kedua, dulu agi ari nya madahka Sarawak nyadi nengeri ti kedua pemadu besai ba penatai pemisi sentang eksport nengah kayu batang enggau produk kayu.
Ku iya, pengeluar kayu nyapai lebih ari tujuh juta meter padu taun nyin tadi.
Ku iya nandu, taja pia, proses industri nangkan di nengeri tu agi ngemeratka produk baka kayu ramu, plywood enggau veneer.
“Seriris enggau pelin besai kami nguing ngagai industri ti nangkan ke nya sereta berunding deka ngangkatka tikas guna kayu ba produk, nengeri tu udah mansutka polisi ngurangka eksport kayu batang ngagai 20 peratus lalu nikika guna kayu batang ngagai 80 peratus ungkup proses industri ti nangkan ke nya,” ku iya.
Ba program ke baru enggau
Laban bansa kayu ti diulih ari kampung ke ditanam bebida ari kampung asal ari sukut pengering, patut bisi peminta bejalaika pengawa mansik enggau ngemansang dikena nempa kayu batang nyadi produk kayu ke digaga ti ulih dikena dalam industri ti nangkan ke nya. Datuk Amar Awang Tengah Ali Hasan Sapit Kepala Menteri
CeWEP, ku iya, tu ngelaika siti agi pekara ti besai reti nyadi di menua tu ba pengawa ngangkatka tikas produk kayu ramu dikena nangkup peminta dunya.
Ku iya, penatai orang gawa ti bepenau sereta bepengelandik beguna endar dikena ngemansangka industri hiliran enggau kayu ramu Sarawak.
“Pengawa bejalaika program baru ngasuh sedia agi ba orang gawa bepengelandik dalam sektor pemprosesan bepelasarka kayu ramu di Sarawak.
“Nyadi menteri ti ngatur pengawa ba pemansut asal, aku endang nyukung program ti dipejalaika UCTS,” ku iya.
Ngelansa pasal CeWEP, ku iya, pengawa numbuhka nya endang engkeman diatu lalu iya deka meri pemerat ba pengawa mansik enggau ngemansang (R&D) ba kayu ke digaga ke diulih ari kayu ba- tang ba kampung ditanam.
“CeWEP dipelaba deka meri ngagai pemansang produk kayu ke digaga dalam industri kayu ramu di Sarawak sereta bekenaka produk dalam industri berumah,” ku iya.
Iya udah nya madahka pengawa dipejalai UCTS ba ngadaka program baru enggau numbuhka CeWEP begunaka sukung ari semua raban ti patut.
“Aku deka meransang semua industri kayu ramu mansang sereta gawa begulai enggau perintah nentuka industri kayu ramu kitai deka seruran nyadi industri besai di Sarawak begulai enggau mayuh agi ke benung dikemansang,” ku iya.
Sama bisi datai, Vice Chancellor UCTS, Professor Datuk Dr Abdul Hakim Juri, Menijar Besai STIDC Datu Sarudu Hoklai enggau Kaban Kaunsil Mendam STA Temenggong Dato Vincent Lau.