KKKWKPKK dikeandal meransang raban bini soldadu nyereta program ti diatur
SIBU: Opis Menteri Pengintu Pengelantang, Pengelikun Mensia Mayuh, Orang Indu, Ruang Bilik enggau Pemansang Nembiak Mit (KKKWKPKK) dikeandal enda ninggalka raban bini soldadu ba kem soldadu ngambi bagi ba program ke diatur opis menteri nya.
Panglima Semilan Briged (9 Briged) Brigidier Jeneral Dato Dzulkafli Mustaffa madah, tu bepun ari piak sida ti semampai nyukung program opis menteri nya ti dipeda mai mayuh penguntung ngagai semua.
“Kitai ngarapka nangkan ke tu, opis menteri tu ulih ngerijister nama bini soldadu tauka ‘pranita’ ba program ti bekaul enggau ruang bilik tauka orang indu,” pia ku iya madah.
Iya mantaika jaku nya pengawa bejadi Program Mega Wisma Wanita Training Centre Angkatan Tentera Malaysia (WWTC)@ATM Kem RASCOM ditu, kilah ensana.
Pengerami nya dipenyadi Menteri Pengintu Pengelantang, Pengelikun Mensia Mayuh, Orang Indu, Ruang Bilik enggau Pemansang Nembiak Mit Dato Sri Fatimah Abdullah.
Sama bela datai maya tu iya nya Chairperson BAKAT 1 Divisyen Jacqualine Peris, Chairperson BAKAT 31 Briged Sarimah Mohd enggau Direkter JKWS Noriah Ahmad.
Bekenangka program Mega WWTC)@ATM nya, Dzulkafli madah, program baka nya ukai semina nambahka penemu tang deka nyadika platform nyintalka agi kaul raban sereta nyadi jematan piak sida begulai enggau opis menteri.
“Program ke digulu 210 iku tu ti diatur dalam kandang dua hari deka dikena nyadi pengelandik tambah bala bini soldadu, bini raban ke gawa ba Opis Menteri Ngetan Menua enggau raban soldadu indu,” ku iya madah baru.
Berebak enggau tu, Dzulkafli bela madahka bala bini soldadu di kem RASCOM endang bisi program kediri empu ti semampai dikemu- jurka baka meresa pengerai, nemuai, kelas nyumai sereta program bekaul enggau komuniti ke bukai.
“Ngagai raban ‘Badan Kebajikan Keluarga Angkatan Tentera’ ( BAKAT), aku ngarapka kita ngambi bagi ba program baka tu kelimpah ke kisuk ngaduka ruang bilik laban ari tu kita deka bulih penemu enggau peneleba.
“Aku andal pengeransing enggau ulah rindu ngulu pogram baka tu deka ngangkatka agi institusi ruang bilik sereta komuniti,” ku iya sambil ngarapka program raban indu ba kem soldadu ulih disaup opis menteri nya nyengkaum bantu mata duit ngambika semampai mujur.